Путин бара „железно-бетонски“ гаранции, за да го рестартира „Јужен тек“

Добивај вести на Viber

Ако Бугарија сака рестарт на проектот „Јужен поток“, ќе треба да даде „железно-бетонски“  гаранции од правен карактер, дека тој ќе се реализира. Ова го истакна рускиот претседател Владимир Путин денес, цитиран од руските медиуми.

„Гледаме дека бугарската страна сега сака да се врати на  „Јужен поток“, но ние претрпевме низа загуби од одбивањето на европските партнери за изградба на гасоводот и намерите не стигнуваат. Ни требаат „железно-бетонски“ гаранции од правна природа. Такви засега нема“, вели Путин.

Во меѓувреме на историската средба меѓу Путин и неговиот турски колега Реџеп Ердоган стана јасно дека ќе се работи на замрзнатиот проект за гасоводот „Турски поток“. „Тој ќе биде реализиран што е можно побрзо“, увери денеска турскиот претседател на прес-конференција по средбата со Путин.

Рускиот претседател од своја страна истакна дека изградбата на делот од гасоводот, наменета за турскиот внатрешен пазар, би можела да започне „во многу скоро време“, но истакна дека изградбата на делот наменет за испорака на гас за ЕУ, ќе зависи од гаранции, кои Брисел ќе треба да ги обезбеди.

„Русија не се спротивставува на проектите „Јужен поток“ и „Турски поток“ и е подготвена да реализира проекти за изградба на гасоводи во присуство на гаранции“, изјави во интервју за телевизијата „Россија 24“ рускиот министер за енергија Александар Новак, цитиран од агенциите.

Проектот „Турски поток“ беше објавен на крајот на 2014 година во исто време со откажа проектот „Јужен поток“ за пренос на гас по дното на Црното Море, и беше блокиран од ЕУ.

Идејата на Турски поток беше не само да се испорачува гас на Турција, но и таа да стане транзитна земја за снабдување на гас кон јужна Европа наместо Украина.

Првичниот проект предвидуваше првите испораки да започнат кон крајот на 2016 година, а на крајот се постигна значителен капацитет од 63 милијарди кубни метри годишно, кој подоцна беше намален на 32 милијарди.

Проектот беше замрзнат откако Турција си дозволи да собори руски воен авион во ноември 2015 година.

По неуспехот на „Јужен поток“ и замрзнувањето на „Турски поток“ Владимир Путин повеќепати изјавувал дека изградбата на гасоводот на европска територија ќе се случи само ако Брисел даде во писмена форма приоритетен статус на овие проекти, наведува АФП.