РАМА СЕ ПОФАЛИ: Аеродромот во Тирана e на прво место во Европа

Добивај вести на Viber

Аеродромот во Тирана e на прво место во Европа според порастот на бројот на патници. 

„Неколку години по ред бројот на патници кои ја користат услугата на меѓународниот аеродром во Тирана е во постојан раст. Ова го потврдуваат и најновите податоци објавени од Меѓународниот совет на аеродроми. Податоците од овој графикон покажуваат дека за периодот јануари-август 2024 година, во однос на истиот период од 2019 година, бројот на патници што го користеле аеродромот во Тирана е зголемен за 259,4 отсто“, напиша премиерот Еди Рама на Фејсбук.

Лани се регистрирани 7,5 милиони патници, а за годинава се очекува бројка повисока од 10 милиони. Како што наведува Рама само во јули имало над 1,2 милиони патници. 

Според ранг листата на Меѓународниот совет на аеродроми овој во Тирана ги остава зад себе не само земјите од регионот со консолидиран туризам, туку и многу земји во Европа.

Хрватска забележала раст од само 18,2 отсто,  Италија 14,7 отсто, Северна Македонија 19,6 отсто и Србија 32 отсто. Црна Гора претрпела намалување од 12,5 отсто на бројот на патници преку аеродромот во Подгорица, додека Косово забележало значителен раст од 71,2 отсто. 

Услугите на аеродромот, од каде моментно може да се патува на повеќе од 100 дестинации, ги користат и се поголем број македонски, косовски и црногорски граѓани.