Ребалансот на буџетот денес жешка точка во Собрание
Објавено во: Економија 23 Септември, 2019
Пратениците и денес ќе водат дебата за ребалансот со кој новата министерка за финансии вели дека ќе има повисоки плати за вработените во приватниот сектор и во јавната администрација но и повеќе средства за поддршка на активните мерки за вработување.
Ребалансот кој надлежните го прекроија беше дочекан со реакции кај дел од експертите. Се коментираа одлуките со кои се скратија пари во повеќе ставки.
-Ве молам, не пумпајте го буџетот за да потоа вие ни делите пари. Нам не ни требаат Дедо Мразовци. Поефикасно е да секоја фирма и семејство сами си одлучат за потрошувачка или штедење на сопствениот расположив доход. Вам ви е оставена наједноставната работа. Направете амбиент.
Со поткуп на младите преку разни субвенции и трансфери нема да ги задржите туку со градење на амбиент за исполнување на сопствени идеи без ваша интервенција во трансцедентен занес дека треба да бидеме понизно благодарни за она што од наши пари ќе ни го трансферирате-искоментира на социјалните мрежи Марјан Николов - од Центарот за економски анализи.
Вицепремиерот Анѓушев пак го пофали новиот ребаланс.
„Со ребалансот на буџетот, најавуваме нова мерка за стимулирање на растот на платите, поддршка на стопанствениците и сузбивање на сивата економија.
Сите компании кои ќе покачат нето плата на кој било вработен, ќе бидат поддржани од Владата со субвенционирање на придонесите за социјално и здравствено осигурување за износот за кој е покачена платата“, напиша Анѓушев на Фејсбук.
Од друга страна пак, со критика се огласи и Здравко Савески.Тој во најновата колумна го анализираше новиот предлог за ребаланс на буџетот и напиша:
„Владата го усвои предлог-ребалансот само неколку дена по изборот на новата министерка за финансии Нина Ангеловска. Тоа кажува дека Владата изгласа предлог-ребаланс, кој не беше подготвен од нејзина страна. Ја знаеме причината. Заев доби луда идеја да биде и министер за финансии, но ретерира по притисокот од стручната и општата јавност и по реакцијата на Антикорупциската комисија. Па, дури се подготвуваше ребалансот, немаше министер за финансии. Самиот факт дека владата подготвуваше ребаланс без да има избрано министер за финансии индицираше дека Заев ќе бара министер кој само ќе клима со главата и кој ќе биде извршител на желбите на оние што навистина ги држат уздите на економската политика на владата: газда Зоки и газда Кочо. И, очигледно, тие во Ангеловска ја најдоа својата англиска кралица на чело на Министерството за финансии. Она што навистина не го разбирам е зошто Анѓушев не е назначен за министер за финансии? И така тој е фактичкиот министер за финансии. А по отстранувањето на Тевдовски, тоа уште повеќе ќе биде така.“