Религиските вредности, духовното наследство и традиција во Република Македонија!

Добивај вести на Viber

Патуваме-уживаме-запознаваме е сентенца која е својствена за секој оној кој сака да патува, да открива нови места и неоткриени предели, но и да осознава и учи за традицијата на едно место, еден народ, една земја. Мојата земја-Република Македонија изобилува со природни убавини, кои со посебен пиетет се чуваат и негуваат и со гордост прикажуваат на секој добронамерник, собеседник и странец желен за откривање на непознатите убавини кои ја красат нашата земја.  Со гордост на секој патувач-истражувач, но и обичен талкач,  можеме да му ја прикажеме сета историја и традиција само ако го прошетаме до некој наш духовен храм, религиски објект кој во себе вткајува религиски вредности, култура и традиција.

И тоа е она што не прави горди на нашата историја и култура, тоа е она што е доказ за нашето опстојување низ векови, тоа е она што ја обележува нашата традиција. Нашите културни знаменитости се наши репрезенти, тое се споменици на културата кои се издигнати од признати и познати мајстори на својот занает и кои со посебен пиетет треба да ги негуваме. Сите знаменитости, со кои нашата земја и те како треба да се гордее се доказ за постоењето на еден народ, една држава, доказ дека сме како пирејот-неоткоренливи, цврсти и жилави,непобедливи, луѓе кои се имуни да опстојат и во сурови услови и да создаваат и развиваат традиција, култура и религија дури и кога им е најтешко.

Религиските објекти се дел од нашата историја

Само еден детален поглед и разглед на сета убост која е распослана низ нашата ни мила држава ќе ги разнежни срцата и ќе ја разгали душата на секој добронамерник и родољубец, на секој истражувач желен да осознае нешто ново и да види природни богатства, но и културни споменици и религиски објекти, кои кај нас ги има во изобилие. Религиските објекти се дел од нашата историја, доказ за постоењето на една религија, која се вкоренила кај нас и благодарение на која се одржува дел од нашата традиција, посебно онаму каде религиското се вткајува со етничкото и културното.

Охридско-струшкиот регион е еклатантен пример за религиско и духовно наследство кое ја одразува сета наша верска традиција, но и го покажува нашиот суштински однос кон духовното, религиското кое има посебно место во одржување на нашиот идентитет и традиција. Здивот ви се одзема од убоста пред вас послана пред Плаошник, такви пејзажи и волшебни убавини може човек само да посака да ги види. Распосланиот Плаошник, тој “величествен џин”, ја изнедрува вековната потреба и желба на нашиот народ за ука и наука-издигнувајќи го Свети Климентовиот универзитет. И тоа е доказ и показ дека нашата нација има корени за наука и култура, има плодна почва и плодно тло за описменување и ширење на науката и образованието. Манастирот во Калишта-струшко крие посебна мистика нa еден верски објект кој изобилува со духовен мир, вредни икони и посебно пештерско сликарство. Живописувањето и резбарството кои ги красат нашите верски храмови се посебно обележје на религиските објекти кај нас и сите тие се создадени од познати и признати мајстори на својот занает.

Наша заложба и задача е да ди посетуваме, чуваме и негуваме

Манастирите во Беровскиот крај, манастирот Свети Јоаким Осоговски во паланечко, се опкружени со такви природни убавини, кои даваат посебен мир и спокој, кои му овозможуваат на верникот, но и обичниот талкач да размисли и да се одмори, да си даде оддишка од секојневните работи што го тиштат и едноставно да ужива во благодетите што му ги овозможува питомата манастирска природа.

Многу песни и стихови се преточени за убавините, многу поеми се напишани за големините и значенијата на нашите верски храмови, многу љубови тука започнувале, многу среќи во нив се вкрстувале. Погледот ви занемува од убавините и значењето што го има црквата Света Богородица во Ново село во Штип, религиски објект кој има толкаво културно, научно и историско значење. Кога ќе ја видите збирката на икони во тој верски храм, кога ќе ја чуете историјата на самата црква, каде учителствувале Даме Груев, Ѓорче Петров и Гоце Делчев и каде се наоѓаат дел од историските записи на револуционерната борба, ќе останете без зборови за храброста на македонските дејци, но и улогата на верските објекти како чувари на оние кои се бореле за каузата и за слободата. Свети Јован Канео, Свети Јован Бигорски, манастирот во Лесново и низа други верски објекти се специфични и значајни не само како места за вршење на религиски ритуали, тие се дел од нашето културно наследство и објекти кои културно оплеменуваат и оплотуваат.

Во нив  многумина го пронашле својот духовен мир, ги пронашле своите инспирации за разни творештва, се вдахновиле и со посебна жар ја вршеле професијата која ја избрале. Тие места за нив значат мир, спокој, духовна благодет, откровение и инспирација.  Наша заложба и задача е да ди посетуваме, чуваме и негуваме бидејќи така се чуваме и себе си, го градиме и одржуваме нашиот религиски и културен идентитет и ја одржуваме традицијата која ни е наследена од нашите предци. Ах таа моја чудесна земја, земја библиска, земја исконска, земја убава, сакана и почитувана, земја чудесна и возљубена.

Д-р Татјана Стојаноска

Институт за социологија

Филозофски факултет Скопје