Русија: „Турски поток“ може да помине низ Грција, Македонија, Србија и Унгарија
Објавено во: Економија 15 Април, 2015
Гасоводот „Турски поток“ не е исклучено да минува низ Грција, Македонија, Србија и Унгарија до Австрија, изјави рускиот министер за енергетика Александар Новак.
Според него преку гасоводот се планираат испораки на руски гас за потрошувачите во Турција, но проектот може да продолжи преку територијата на Балканот до Австрија.
„Знам дека земјите се заинтересирани за овој проект. На пример, испораките на гас до австрискиот гасен јазол „Баумгартен“ се можни преку Грција, Македонија, Србија и Унгарија“, истакнал Новак, додавајќи дека Москва води интензивни преговори со земјите кои би можеле да бидат транзитни територии.
Како што јави српското радио „b92“, кон крајот на април или почетокот на мај се очекува Новак да ја посети Србија во Белград и соопшти дека меѓу темите на разговорот со рускиот министер ќе биде вклучено и проширувањето на „Турски поток“.