Руски туристи „останаа“ во Грција – не можат да се вратат дома!

Добивај вести на Viber

Неколку илјади руски туристи останаа заглавени на грчките острови, откако ненадејно банкротира еден од најголемите руски туроператори „Лавиринт“. Туристите, од кои најголемиот дел биле сместени на островите Крф, Кос, Крит и Родос немаат како да ја напуштат земјата, а грчките угостители се жалат дека нема кој да ги покрие нивните трошоци. Се претпоставува дека бројката на блокирани туристи во Грција би можела да достигнува околу 11.000. Тие не можат да ја напуштат земјата затоа што нема кој да им го организира враќањето назад. Во различни земји во светот, пак, преку „Лавиринт“ летувале дури 25.000 туристи во моментов. Синоќа стотици руски туристи чекале на аеродромот на Родос без да знаат дали ќе бидат превезени до Русија. Од 2010 година бакротирале околу 20 руски туристички компании, како резултат на големата криза која го зафати овој сектор во Русија. Според податоците на руското Биро за статистика, во 2013 година бројот на руски туристи кои заминале на одмор во странство се зголемил за 19,3%. Во исто време, само 9% од Русите можат да си дозволат да патуваат надвор од земјата 2,3 или повеќе пати годишно, а дури 60% од руските граѓани никогаш не биле надвор од границите на некогашниот Советски Сојуз. Санкциите воведени од ЕУ годинава заради случувањата во Украина значително го намалија бројот на руски туристи во некои европски земји, од кои дел очекуваат пад на бројот на гостите од Русија за дури 30% во однос на лани.