САД и официјално влегува во војна со Исламската држава

Добивај вести на Viber

Комитетот за надворешна политика на Сенатот на САД усвои Резолуција со која и даде одобрение на администрацијата на претседателот Барак Обама за отпочнување на тригодишна воена операција против Исламската држава во која ќе бидат ангажирани и копнените сили доколку тоа биде неопходно. Одборот ја одобрил резолуцијата на сенаторот Роберт Менендез, кој припаѓа во редовите на демократите, со која операцијата се ограничува на три години, а ангажирањето на копнените сили ќе биде можно само во одредени случаи. Ова е и првото изјаснување во Конгресот со кое се дава одобрување на воени дејства на Соединетите Американски Држави против Исламската држава, а за ваквата одлука гласале десет сенатори, додека осум биле против. Во борбата против Исламската држава Обама се потпираше на одобренијата од Конгресот кои поранешниот претседател Џорџ Буш ги искористи за да ги оправда воените акции по терористичките напади во Њујорк и Вашингтон на 11 септември 2001. Според Американскиот државен секретар, Џон Кери, ваквото одобрување од Конгресот не треба да ја ограничи американската воена операција само во Ирак и Сирија ниту пак да ко спречи американскиот претседател да ги ангажира копнените сили доколку биде утврдено дека тоа е неопходно. Американскиот конгрес претходно одобри 500 милиони долари за обука и поддршка на умерената сириска опозиција која исто така се бори против екстремистите на Исламската држава.