САД со “поклон“ за Украина
Објавено во: Свет 03 Април, 2018
Американскиот сенатор, републиканецот Роб Портман за Радио Слободна Европа изјави дека новото напредното американско оружје ќе и помогне на Украина подобро да се брани од руската агресија во скоро петгодишниот конфликт.
Американскиот сенатор Роб Портман изјави дека смртоносното дефанзивно оружје, кое Соединетите држави наскоро ќе и го испорачаат на Украина, ќе и помогне на таа земја да одврати каква било идна агресија од страна на сепаратистите поддржани од Русија.
„Мислам дека тоа е вистинската работа за САД, за другите, што се однесува до Украина, да им се дозволи да купат оружје за да можат да се бранат, вклучувајќи го и новото оружје кое сега се испорачува“.
Стејт департментот ја одобри продажбата на американски антитенковски ракети за Украина во вредност од 47 милиони долари.
Според Портман, кој е член на влијателниот сенатски Комитет за надворешни односи, новото оружје наречено „Џавелинс“ исто така би требало да доведе до траен мировен договор во Украина, вклучувајќи и исполнување на спогодбата од Минск која има за цел запирање на борбите во кои од 2014 година досега загинаа над 10 илјади луѓе.
Спогодбата од Минск е договорена меѓу Украина, Русија, Германија и Франција.
„Сакаме да видиме мир во регионот. Украинците не се обидуваат да бидат во офанзива, туку само се обидуваат да го одбранат сопствениот интегритет“.
Испораката на новото оружје е дел од новите мерки на администрацијата на Доналд Трамп за поцврст приод во односите со Русија.
И покрај постојаните повици на Трамп за подобри врски, неговата администрација продолжи да го засилува притисокот врз Русија, користејќи санкции и други алатки за казнување на Москва за своите акции во Украина, Сирија и сајбер-просторот.
Украина со години бара да купи противтенковско оружје од Соединетите држави.
Претходникот на Трамп, Барак Обама се противеше стравувајќи дека тоа ќе ја антагонизира Русија и ќе го интензивира конфликтот.
Некои официјални претставници на САД пак изразија страхување дека оружјето би можело да падне во рацете на сепаратистичките борци или да биде продадено на црниот пазар.