САШО МИЈАЛКОВ НАМЕСТО ОД УТРЕ ВО ЗАТВОР ОД 22 АВГУСТ, добил одложување од две недели
Објавено во: Македонија 07 Август, 2022
Поранешниот директор на УБК, Сашо Мијалков, иако од утре требаше да оди во затвор, тоа нема да се случи, јавува ТВ 24. Мијалков до надлежниот охридски суд побарал одложување на казната, а судот го прифатил барањето.
Наводно судијата му дозволил да го одложи влегувањето во струшкиот затвор, но само за две недели. По истекот на овој рок, Мијалков сепак ќе мора да се пријави во затворот. Откако експресно од скопјанец стана охриѓанец поранешниот директор на УБК, Сашо Мијалков казната од три години затвор ќе ја одлежува во Струга.
Затворски извори за ТВ 24 објаснуваат дека откако ќе почне да ја издржува казната затвор, третманот на Мијалков ќе биде ист како и за другите затвореници. Причина за ова е тоа што затворот во Струга е од отворен тип и таму не постојат посебни одделенија како што има во другите затвори.
Поранешниот шеф на тајната служба, Сашо Мијалков призна вина и се спогоди со Обвинителството за гонење организиран криминал за случајот „Империја“. Со спогодбата, Мијалков е осуден на 3 години затвор. Освен ова му беше изречена и парична казна во износ од шест милиони евра, а му беше одземен и дел од имотот вреден околу 30 милиони евра.