Се јави уште едно ново бугарско здружение од Македонија: Загрижува отпорот кон предлозите на Љубчо Георгиевски
Објавено во: Македонија 03 Март, 2021
Уште едно ново бугарско здружение со седиште во Македонија, за кое се верува дека со поддршка на патриотската коалиција ВМРО-БНД, е финансирано од Бугарија, се огласи по повод најновите предлози на поранешниот премиер Љубчо Георгиевски, а тоа што не добил поддршка од јавноста го оценуваат како разочарување.
Станува збор за „Бугарското здружение на родовите од Македонија“, кое се декларира како патриотска организација што „обединува потомци на кланови на истакнати македонски писатели и револуционери како Кузман Шапкарев, Борис Дрангов, Мише Развигоров, Тодор Александров и многу други“
„Со загриженост ги следиме најновите јавни коментари во братската Република Северна Македонија на конструктивните идеи и предлози на поранешниот премиер Љубчо Георгиевски за надминување на историските и политичките недоразбирања меѓу нашите две земји.
Бројните манифестации во медиумскиот простор на јавни и политички фигури од различен калибар и со различни улоги и функции во голема мера наликуваат на јавниот линч на кој беше подложен проф. Денко Малески во пролетта 2020 година. Со горчина забележуваме дека секој обид за приближување меѓу двата блиски соседи, со враќање на нашата вистинска историја, наидува на жесток отпор од влијателните структури во Северна Македонија. Ова е продолжение на методите на Студената војна за третирање на општеството со непријателски дух настроен кон Бугарија. За жал, како резултат на тоа, главните политички сили во републиката со своите активности создаваат тензија, поделба и нестабилност“, се наведува во соопштението на здружението испратено до бугарските медиуми.
Од таму додаваат дека „нескротливите јавни и политички реакции против разбирањето меѓу двете земји покажува дека во Вардарска Македонија продолжуваат да постојат моќни фактори, кои се спротивставуваат на интеграцијата на земјата и целиот регион во Европската унија“
„Загрижено забележуваме дека со подигање на агресивни и лажни историски тврдења, тие се обидуваат да создадат тензија и нестабилност во овој дел од Европа и трајно да го попречат европскиот пат на Република Северна Македонија
Бугарското здружение на родовите пд Македонија ќе се спротивстави на јазикот на поделба и омраза и ќе работи на зачувување на сродството што постои меѓу граѓаните на Бугарија и Северна Македонија“ се вели во соопштението.