Шилегов набавува 40 еко-автобуси за 10 милиони евра, ЕБОР вели може околу 50 за истите пари

Добивај вести на Viber

Со кредит од Европската банка за обнова и развој во висина од 10 милиони евра Скопје догодина ќе добие 40 нови автобуси на природен гас, најави пред десет дена градоначалникот Петре Шилегов на прес-конференција, но кредиторот, соопштувајќи го официјално договорот на 12 јули, објави дека за истите пари може да се купат околу 50 еко-автобуси со придружни објекти.

„Јавно сообраќајно претпријатие - Скопје има намера да ги искористи средствата од заемот од Европската банка за обнова и развој [ЕБОР) за проект за делумно обновување на автобуската флота, преку снабдување со автобуси на природен гас. 

Предложениот проект, кој има проценета вредност од 10 милиони евра, ќе бара набавка на следните стоки, работи и услуги:

Набавка на околу 50 CNG автобуси и придружни објекти

Тендерот за горенаведените договори се очекува да започне во втората половина на 2018 година.

Договорите што треба да се финансираат со приносите од заем од Банката ќе бидат предмет на Политиките и правилата за набавки на Банката и ќе бидат отворени за фирми од која било земја. Приносите од заемот на Банката нема да се користат за плаќање на физички или правни лица или за увоз на стоки, доколку таквото плаќање или увоз е забрането со одлука на Советот за безбедност на Обединети Нации“, се вели во соопштението.на ЕБОР.

Инаку, кредитот ќе биде со каматна стапка од 1 отсто, 3 години грејс период и 7 години рок на отплата. Тендерот ќе биде распишан на есен а до крајот на годинава се очекува да биде избрана фирмата од која ќе бидат набавени. Предвидено е 2​/3 да бидат зглобни нископодни со капацитет за 150 патници, а остатокот единечни. 

- Од вчера официјално ја почнавме постапката за набавка на 40 нови еколошки автобуси на гас кои ќе го променат јавниот транспорт во градот и нема да ја загадуваат околината. Управниот одбор со поддршка на ЈСП и Град Скопје ја почна постапката за добивање кредит од Европската банка за обнова и развој во висина од 10 милиони евра - рече објави градоначалникот Шилегов.

Според проценките на Градот и ЈСП„Скопје“ заштедата која ќе ја има претпријатието со новите автобуси на гас споредбено со кинеските дизел е 60 евра од еден автобус дневно, односно годишно со набавката на 40 автобуси ќе се заштедат од 700.000 до 900.000 евра.

Александар Кузмановски