ШТИП ДОБИВА ФАБРИКА ОД АВТОМОБИЛСКАТА ИНДУСТРИЈА, со новата инвестиција „Магна“ ќе таргетира 600 работници

Добивај вести на Viber

Канадска компанија „Магна интернационал“ која дизајнира, развива и произведува автомобилски системи, модули и компоненти кои се испорачуваат на сите најзначајни производители на автомобили во светот отвара фабрика во Македонија. 

Ова го најави премиерот Димитар Ковачевски кој потенцираше дека ова е првата голема странска инвестиција која ќе се отвори во Технолошки-индустриската развојна зона во Штип.

- Компанијата веќе има една инвестиција во ТИРЗ Струга, за производство и склопување на ретровизори и други технолошки продукти за автомобилската индустрија. Во ТИРЗ Штип компанијата ќе отвори нова фабрика каде тест производство се планира да биде годинава, а сериското производство ќе започне во првата половина од 2024 година - посочи премиерот и истакна дека со политиките што ги креира Владата, се создава подрачје безбедно за инвестирање и услови за нови и добро платени работни места.

Ковачевски потенцираше дека Македонија може да напредува и да се развива, а таква можност препознаваат многу странски етаблирани компании на светско ниво и одлучуваат да инвестираат во државата.

- Технолошки-индустриските развојни зони, 2022 година ја завршија со 2.300 нови работни места, над 430 милиони евра нови инвестиции, а во октомври лани се надмина и највисоката граница на извоз од три милијарди евра, што беше претходен највисок резултат постигнат во 2021 година - истакна премиерот.

Јован Деспотовски, директор на ТИРЗ истакна дека 2022 е најуспешната година кога е во прашање работењето на зоните, и дополни дека ја започнуваат годинава со нова странска инвестиција.

- Магна мехатроникс станува дел од семејството на ТИРЗ. Годинава ја започнуваме со нова инвестиција од 40 милиони евра која во првата фаза ќе донесе 600 нови работни места. Она што е важно е дека минатата година извозот на компаниите во Зоните, достигна највисоко ниво од 3,7 милијарди евра односно 25 отсто над највисоката точка која ја достигнавме во 2021. Годинава ја завршуваме и со нето ефект на извозот и увозот од над 10 проценти. Тоа се пари кои се останати во домашната економија. Првичните пресметки велат дека 40 отсто од овие средства се останати и во буџетот и во џебот на над 16.300 наши сограѓани кои работат во овие компании. Само во 2022 имаме над 2.300 нови работни места - истакна Деспотовски.

Директорот на ТИРЗ потенцираше дека кога се во прашање зоните, значајно е што за секој денар исплатена поддршка од државата во буџетот се враќаат 4 денари. 

- Имаме и зголемен обем на инвестиции, но и зголемен квалитет и зголемена додадена вредност. Очекувам дека и годинава ќе продолжи забрзан раст на работни места и нови инвестиции - изјави директорот Деспотовски.

Според владините претставници новата инвестиција во Штип ќе помогне во рамномерниот регионалниот развој.