ШТИП ТАГУВА ПО МЛАДИОТ ЛЕКАР КОЈ ПРЕРАНО ЗАМИНА - на 35 годишна возраст почина д-р Симон Василев
Објавено во: Македонија 18 Декември, 2021
Вчера на 35 годишна возраст по кратко боледување почина доктор Симон Василев. Тој беше роден 1986 година во Штип. Доктор Василев дипломираше на Медицинскиот факултет во Стара Загора, Бугарија, а работеше како општ хирург во Клиничка болница Штип. Моментално тој ги посетуваше специјалистичките студии во Македонија, за стекнување титула доктор специјалист.
Доктор Симон Василев беше ценет и почитуван другар, пријател, роднина, подготвен секогаш и на секого да помогне во најразлични ситуации. Истовремено, во најтешките услови на работењето, тој беше соработник и голем поддржувач на редакцискиот колегиум на М-Нет телевизија, од каде всушност соопштија за смртта на Василев.
Градот Штип и лекарската фела изгуби исклучително значајна личност во својата професија и ги задолжи своите колеги да продолжат по неговиот професионален пат. Неговиот лик и неговото дело засекогаш ќе бидат запаметени од неговите сограѓани и нека му е светол патот и царството небесно.