ШТИПЈАНЕЦ ВО НАJГОЛЕМАТА САЈБЕР КРИМИНАЛНА ОРГАНИЗАЦИЈА: Извлекле 530 милиони долари од сметки од целиот свет
Објавено во: Македонија 20 Февруари, 2018
Штипјанец e дел од досега најголемата откриена сајбер криминална организација.
28-годишниот Марко Леопард се товари за учество во криминална организација која вршела кражби на идентитети, кредитни картички, финансиски и банкарски информации, со што успеале на нелегален начин да извлечат 530 милиони долари од сметки на луѓе од целиот свет.
Информацијата е објавена на веб страната на американското Министерство за правда на 7-ми месецов. Мозок на 36-члената организација бил Свјатослав Бондаренко од Украина, а вклучени се хакери од Пакистан, Англија, Украина, Египет, Косово, Австралија, Молдавија, Украина, Америка.
Според обвинението, организацијата е формирана во 2010 година, а штипјанецот и се приклучил една година подоцна. Организацијата е создадена како основна дестинација за купување малопродажни предмети со фалсификувани или украдени информации за кредитни картички на Интернет. Сите членови во организацијата имале дефинирани улоги во хиерархијата на организацијата. На чело биле администратори, а штипјанецот Леопард бил последен во мрежата и негова задача била успешно да ги крие трагите на хакерите.
Тој е уапсен надвор од Македонија, што е негово второ меѓународно апсење за компјутерска измама.