ШТО ЧЕКАМЕ ОКОЛУ ЦРНАТА ЛИСТА: Еве кои можности им стојат на располагање на нашите органи
Објавено во: Македонија 19 Март, 2024
Експерти за Фактор објаснуваат дека Македонија веќе има усвоено Закон за меѓународна соработка во кривичната материја, на собраниска седница која била одржана на 2 април 2021 година.
Законот е потпишан од претседателот на државата и објавен во Службен весник.
Во овој закон, како што објаснуваат познавачите, е предвидена можноста домашен надлежен орган, како што се Министерството за правда, Јавното обвинителство или некој суд, да испратат Замолница за соработка во кривичната материја до надлежна институција на странска држава, според членот 16.
Со Замолницата, која се доставува преку Министерството за правда, од странската надлежна институција се бара достава на списи, информации, материјални докази и предмети за одредена предистрага, истрага или тековен судски предмет за физичко и/или правно лице.
Овој закон, според членот 35, овозможува и формирање на заеднички истражни тимови за истражување и гонење на кривични дела, а договорот за заеднички истражен тим го склучува државниот обвинител на Македонија.
Во членот 39 е предвидено и секое истражно дејствие што го превземал надлежен орган на странската држава да биде изедначено со соодветно дејствие во кривичната постапка пред домашните институции.
Или, како што пластично објаснуваат нашите соговорници, Владата, Министерството за правда и Јавното обвинителство имаат важечки законски основ без одолговлекување, преку Министерството за правда веднаш да испратат замолница до САД за достава на сите документи, списи, докази и информации за лицата на црната листа.
Јавното обвинителство, пак, може веднаш да оформи заеднички македонско-американски обвинителски истражен тим и да поведе самостојна или заедничка истражна постапка и да оформи и да процесуира кривично-правни предмети пред надлежните институции во Македонија.