ШТО ДОНЕСЕ СИЛНИОТ ДОЖД: Поплавена куќа во Чаир, фарма во Битола, има и одрони

Добивај вести на Viber

Центарот за управување со кризи (ЦУК) соопшти дека поради врнежите од дожд кои го зафатија поголемиот дел од државата, регистрирани се зголемувања на водотеците, локални поплави и појава на повеќе одрони на патиштата, но засега нема поголеми штети и сите регионални сообраќајници се проодни.

Штипски регион: зголемени водотечни нивоа и ситни одрони

РЦУК – Штип информира дека на подрачјето под нивна надлежност има слаби врнежи од дожд кои предизвикуваат умерено зголемување на реките и потоките. Во моментот не постои ризик од излевање.

На патните правци Делчево – Македонска Каменица и Делчево – Граничен премин забележани се ситни одрони, а екипите на ЈП за одржување на регионални и магистрални патишта се постојано на терен и вршат расчистување. Сообраќајот се одвива нормално по влажни коловози.

Скопје: поплавена куќа во Чаир

Како последица од обилните врнежи во скопскиот регион, пријавено е поплавување на куќа на ул. Исмаил Кадаре бр.87 во Општина Чаир. Надлежните служби се известени и постапуваат на терен.

Куманово: излевање на Пчиња и наталожени дрвја кај Коински мост

РЦУК – Куманово пријавува дека на подрачјето на Општина Старо Нагоричане има излевање на реката Пчиња на неколку локации:

• с. Пелинце (кај Меморијален центар АСНОМ)

• кај Бања Стрновац

• кај Коински мост (помеѓу с. Челопек и с. Коинце), каде има насобрана дрвна маса и отпад

Испратена е екипа која работи на расчистување на мостот.

Битола: големи одрони и поплавена фарма во Породин

РЦУК – Битола известува за одрони со големи камења на:

• патот Битола – Прилеп, кај с. Лознани

• патот Ресен – Охрид, кај Буково

За настаните се известени МВР и надлежните јавни претпријатија.

Пријавен е и поплавен објект – фарма во с. Породин, за што е информиран Штабот за заштита и спасување.

Од 10:00 часот се врши расчистување на повеќе критични локации:

• кај с. Карамани – две машини од ЈП „Водостопанство Битолско Поле“

• кај мостот пред Стентон Градба – една машина од „Нискоградба“

• кај с. Лажец – две машини

Нивото на реката Црна изнесува 1.80 см, без опасност од излевање.

Во Општина Ресен екипи на „Македонија пат“ и ЈКП „Пролетер“ работат на расчистување речни корита. Нема штети на домови или земјоделски површини. Одрон на патот кон с. Крушејца утринава е расчистен.

Општините Кривогаштани и Долнени информираат дека нема нови штети од врнежите, а во Општина Крушево не се бележат поплави, освен благо покачување на нивоата на вештачките акумулации и реката Црна.

Сообраќајот – стабилен, но со влажни коловози

ЦУК соопштува дека сите регионални патишта се проодни, иако коловозите се влажни и се препорачува внимателно возење.