ШТО Е ХАИБАР - ИРАН МУ СЕ ЗАКАНУВА НА ИЗРАЕЛ СО ОВА ОРУЖЈЕ: Нема информации кога ќе ја лансира

Добивај вести на Viber

По екслацијата на конфликтот со Израел, иранските власти вчера се заканија со лансирање на ракетата „Хаибар“, со драматично предупредување: „Светот ќе биде шокиран од она што ќе го види“.

Пораката доаѓа по досега најжестоките напади меѓу двете земји, а и иранските власти и израелскиот премиер Бенјамин Нетанјаху најавија продолжување на воените операции, пишува Индекс.хр.

Што е ракетата „Хаибар“?

Ракетата „Хаибар“, именувана по историската Битка за  „Хаибар“ во 7 век, е модерна балистичка ракета со среден дострел (MRBM) која Иран ја опишува како нова генерација на својот ракетен арсенал. Според иранските тврдења, нејзиниот дострел е околу 2.000 километри, што ѝ овозможува директно да ја погоди израелската територија, како и други потенцијални цели на Блискиот Исток.

Иако официјално не е потврдено кога ќе се случи лансирањето, најавите од Техеран јасно сугерираат дека тоа би можело да биде одговор на најновите израелски напади, кои ја погодија иранската воена инфраструктура и убија голем број високи функционери на Револуционерната гарда.

Според достапните информации, ракетата „Хаибар“:

- носи конвенционална боева глава со можност за зголемена експлозивна моќ во споредба со претходните модели
- има подобрени системи за наведување кои вклучуваат инерцијална навигација со помош на GPS, што ја зголемува прецизноста
- достигнува хиперсонични брзини во фазата на повторно влегување во атмосферата - помеѓу 12 и 15 маха, или околу 4 до 5 километри во секунда, што го отежнува нејзиното пресретнување со противракетни системи

Иранските изјави нагласуваат дека лансирањето на „Хаибар“ треба да ја демонстрира воената супериорност на Иран и да ги предупреди ривалите дека одговорот на секој напад ќе биде „силен и стратешки“. Иако деталите за бројот на достапни ракети и можните цели остануваат непознати, симболичната порака - како и техничките можности на оваа ракета - јасно укажуваат на подготвеноста на Иран да го ескалира конфликтот.

Ризикот од поширок регионален конфликт расте

Израелските власти сè уште не ги коментирале изјавите од Техеран, но израелската армија и разузнавачките служби веќе се во состојба на зголемена готовност. Со оглед на дострелот на ракетата „Хаибар“, Израел, како и американските бази во регионот, би можеле да бидат нејзини цели.

Меѓународните набљудувачи предупредуваат дека лансирањето ракети од ваков тип дополнително би ја дестабилизирало веќе експлозивната ситуација. Во време кога Блискиот Исток се соочува со отворен воен конфликт меѓу Израел и Иран, најавата за оружје кое е тешко за пресретнување предизвикува загриженост и надвор од регионот.

Иако сè уште не е познато кога - и дали - Иран ќе ја лансира ракетата „Хаибар“, самата закана има моќен психолошки и стратешки ефект. Во комбинација со стотиците беспилотни летала и ракети што веќе се лансирани, јасно е дека Иран се обидува да испрати порака дека нема да остане пасивен во услови на израелски напади, пишува Индекс.хр.