Што претставува Офталмоплегија – Мрзливо око?
Објавено во: Стил 22 Мај, 2014
Офталмоплегија претставува пареза или парализа на очните мускули.
Причини за настанување
Причините може да бидат различни: трауматски (на пример фрактура на базата на черепот), воспалителни (менингитис, сифилис, ботулизам, полирадикулоневритис), дегенеративни (прогресивна нуклеарна офталмоплегија), васкуларни (склеротични петехии во мезенцефалон), туморски (менингеом на базата на черепот).
Клиничка слика
Според локацијата на патолошкиот процес кој ја предизвикал парализата, офталмоплегијата може да биде:
- Супрануклеарна – лезиите се над јадрото, оштетени се кортикалните центри за гледање, како и нивната врска со центарот за хоризонтален поглед (понс) или центарот за вертикален поглед (мезенцефалон). Пациентот не може ниту волно нити рефлексно да ги движи очите.
- Нуклеарни – оштетувања на ниво на јадрата, т.е. мозочното стебло.
- Инфрануклеарни – оштетени се самите нерви, односно мозочното стебло. Може да биде комплетна и некомплетна. Надворешната офталмоплегија означува одземеност на надворешните мукули - булбомотори – движачи на очното јаболко, а внатрешната парализа се однесува на мазната мускулатура во окото (во шареницата - ирис и цилијарното тело) - зениците се широки и не реагираат на светлина и акомодација.
- Интернуклеарни – оштетен е трактус лонгитудиналис медијалис. Тој претставува асоцијативен пат на мозочното стебло кој меѓусебно ги поврзува јадрата на булбомоторите како и со нуклеус вестибуларис јадрата на цервикалниот дел на 'рбетниот мозок (благодарение на оваа врска ја вртиме главата, очите и вратот во исто време, кон иста страна).
Дијагноза
Се поставува врз основа на офталмолошкиот и невролошкиот преглед, како и понатамошните испитувања за утврдување на причините (рентгенографија, КТ и МРИ).
Терапија
Терапијата е етиолошка доколку се знае причината. Симптоматското лекување се состои од медикаментозно (витамин Б), физикално (електротерапија) и оперативно лекување.
