ШТО СЀ ЌЕ ДОНЕСЕ ПОВЛЕКУВАЊЕТО НА БАЈДЕН - тензиите растат, а геополитичките предизвици стануваат сѐ поголеми

Добивај вести на Viber

Повлекувањето на американскиот претседател Џозеф Бајден од претседателската трка ја зголеми глобалната несигурност додека западните лидери се борат со војните во Украина и Газа, со зголеменото влијание на Кина во Азија и со подемот на екстремната десница во Европа.

Размерите на надворешнополитичките предизвици со кои ќе се соочи идниот американски претседател јасно покажува како она што се случува во Вашингтон може да има последици за остатокот од планетата. Со оглед на тоа што потпретседателката Камала Харис се смета за потенцијална замена за Бајден, Израел проценува што би значела нејзината кандидатура за земјата, која се соочува со зголемена глобална изолација поради начинот на кој ја води својата војна против Хамас.

Левичарскиот израелски дневен весник Хаарец објави сторија во која го анализираше односот на Харис кон Израел, наведувајќи дека таа отворено го критикувала Израел за време на офанзивата во Газа. Во последниве месеци, таа беше погласна од Бајден во повикувањето на прекин на огнот, осудувајќи ја израелската инвазија на Рафах и изразувајќи ужас од билансот на цивилни жртви во Газа.

Израелскиот министер за одбрана Јоав Галан му се заблагодари на Бајден за неговата „непоколеблива поддршка за Израел низ годините“. Израелскиот претседател Исак Херцог го пофали Бајден како „симбол на нераскинливата врска меѓу нашите два народи“ и „вистински сојузник на еврејскиот народ“.

Немаше реакција од премиерот Бенјамин Нетанјаху, сојузник на поранешниот претседател Доналд Трамп, чија историја на срдечни односи со Бајден беше нарушена за време на војната меѓу Израел и Хамас.

Како што иранските полномошници ширум Блискиот Исток се повеќе се вплеткуваат во војната Израел-Хамас, САД се соочуваат со регион во хаос. САД и нивните сојузници го обвинија Иран дека ја проширува својата нуклеарна програма и збогатува ураниум до ниво од 60 проценти, речиси во квалитет на оружје.

Смртта на тврдокорниот претседател Ебрахим Раиси во хеликоптерска несреќа го воведе новиот реформски ирански претседател, Масуд Пезешкијан, кој рече дека сака да му помогне на Иран да се отвори кон светот, но го задржа пркосниот тон кон САД. Секој демократски кандидат веројатно би ја продолжил политиката на Бајден за воена поддршка за Украина. Но, незадоволството од администрацијата на Бајден се зголеми во Украина и Европа поради бавното пристигнување на помошта од САД и ограничувањата за употребата на западното оружје.

Украинскиот претседател Володимир Зеленски рече дека ја почитува „тешката, но силна одлука“ на Бајден да се откаже од кампањата и му се заблагодари што помогнал да се спречи рускиот претседател Владимир Путин да ја окупира неговата земја.

Трамп вети дека ќе ја прекине војната против Украина во рок од еден ден доколку биде избран, предизвикувајќи стравувања во Украина дека на Русија може да и се дозволи да ја задржи територијата што ја зазеде во војната. Изборот на Трамп за потпретседател, сенаторот Џеј Ди Венс од Охајо, е еден од најгласните противници на американската помош за Украина во Конгресот. Во меѓувреме, Русија ја отфрли важноста на трката, инсистирајќи на тоа дека Москва ќе ја продолжи својата војна во Украина што и да се случи.

Во последниве месеци, и Бајден и Трамп се обидоа да им покажат на гласачите кој најдобро може да се спротивстави на растечката воена моќ и воинственост на Пекинг и да ги заштити американските бизниси и работници од евтиниот кинески увоз. Бајден ги зголеми царините за електричните возила од Кина, а Трамп вети дека ќе примени царини од 60 отсто на сите кинески производи.

Доктрината на Трамп „Америка на прво место“ ги влоши тензиите со Пекинг. Но, споровите со геополитичкиот ривал и економски гигант за глобалните војни, трговијата, технологијата и безбедноста продолжија и во мандатот на Бајден.

Официјалната реакција на Кина на трката за претседател на САД беше претпазлива.

„Изборите во САД се внатрешна политика на САД. Немам коментар за ова“, изјави портпаролот на Министерството за надворешни работи Мао Нинг.