ШВАЈЦАРИЈА ОТКРИ КОЛКУ ВРЕДИ ЗАМРЗНАТИОТ РУСКИ ИМОТ: Санкциониран само мал дел од она што Русите го поседуваат

Добивај вести на Viber

Швајцарското Министерство за економија во четвртокот објави дека од 25 ноември 2022 година ги замрзна руските средства во вредност од 7,94 милијарди долари (7,5 милијарди швајцарски франци), пренесува „РТ“.

Државниот секретаријат за економски прашања (СЕКО) откри и податоци за износот на депозитите пријавени од Русите.

  - Санкционираната сума е само дел од сите руски средства во Швајцарија - изјави за Блумберг Ервин Болингер, шеф на билатералните економски односи на СЕКО, пренесува „Новости.рс“.

Според извештајот, вкупно 123 руски државјани или ентитети пријавиле 7.548 „деловни односи“ до телото, што претставува имот од 48,8 милијарди долари (46,1 милијарди франци).

- Замрзнатите износи може да се зголемат ако, на пример, се додадат нови лица на списокот или ако се идентификуваат нови имоти - се наведува во соопштението и се додава дека „може да се намалат доколку замрзнатите средства како мерка на претпазливост повторно се ослободат кога ќе завршат појаснувањата“.

Швајцарија им се придружи на земјите на ЕУ во воведувањето на неколку рунди антируски санкции поради воената операција на Москва во Украина. Во август Берн ги замрзна средствата на руската Сбербанк и ја забрани трговијата со златни производи со Москва. Во март, Кремљ ја стави Швајцарија на списокот на непријателски земји, на кој се вклучени членки на ЕУ и други земји.

Во октомври, Фабијан Мајенфиш, портпарол на швајцарското федерално одделение за економски прашања, образование и истражување, рече дека Швајцарија не го поддржува барањето на украинскиот претседател Володимир Зеленски да му ги предаде замрзнатите руски средства на Киев.

И властите на ЕУ и на САД во моментов работат на конфискација на руските средства замрзнати со санкциите поврзани со Украина, обидувајќи се да најдат начини за да ги направат заплените легални.