Синдикатите бараат оставка од Митревски - тврдат работи за свој интерес

Добивај вести на Viber

Од Синдикатот на УПОЗ бараат итна и неотповиклива оставка од лидерот Живко Митревски. 

Објаснуваат дека Митревски без одлука на Претседателството или Советот на ССМ, злоупотребувајќи ја својата позиција потпиша Меморандум со ВМРО-ДПМНЕ, што е во спротивност со Статутот и Програмата на ССМ.

„Синдикатот на УПОЗ најостро реагира на штетниот и дрзок чин на Живко Митревски, кој за свои потреби и лични привилегии, го турка синдикатот во партиски канџи.
Без консултации, самоволно, тој на своја рака го потпишал Меморандумот за соработка со политичката партија ВМРО – ДПМНЕ. За вакво вртење на курсот и занемарување на заложбите на синдикатот да ги штити правата на работниците, а не на партиите, мора да одлучи и заседава Претседателството и тоа со консензус, а не со надгласување или Советот на ССМ како највисок орган. Да биде иронијата поголема говори и податокот што, само неколку дена претходно, Живко Митревски на членовите на Советот им испрати известување во кое им укажува и ги лаже дека е донесена Одлука со која се става своевиден мораториум на сите активности во ССМ. Со тоа како што стои во известувањето ССМ ќе ја промовирал својата непартиска, недржавна, автономна позиција, без да се вклучува во никакви политички процеси, преговарање или агитирање. Тој дури и се заканува со преземање на “своевидни мерки за нивно санкционирање вклучително и кривични постапки”. Ние сме за борба за работничките права, но не и за политичко агитирање и инволвирање. Ние до партиите имаме конкретни барања, а секој наш член самостојно ќе одлучи за кого ќе гласа“ - пишуваат од УПОЗ. 

Велат дека Митревски се бори за свој интерес, а не за работниците. 

Митревски пак бара оставка од претседателот на УПОЗ ,Пецо Грујовски. Во писмено соопштение обвинува дека Грујовски тајно преговара со Ременски, Кирацовски, Јанко Бачев за разлика од ССМ што транспарентно се грижи за обезбедување на континуирани резултати, зголемување на плати,  донесување на историски закони. Наведува дека одлуката за потпишување на меморандумот е со поддршка на 12 од 17 синдикати.