Синдикатот на „Еуроникел“ побара средба со премиерот Ковачевски

Добивај вести на Viber

 Синдикатот на „Еуроникел индустри“ кој претставува 800 вработени во една од компаниите што создаваат најголеми приходи во земјата, побараа средба со премиерот Димитар Ковачевски, но и со други релевантни институции, со цел да се најде решение за спас на комбинатот.

- Ние како синдикален одбор итно бараме прием и средба со премиерот Димитар Ковачевски, вицепремиерот Фатмир Битиќи и министерот за економија Крешник Бектеши, со цел да се побара поддршка за изнаоѓање на решение за нашата компанија во која сме вработени и нејзино понатамошно функционирање, информираше за МИА, Миле Ѓорѓиев, претседател на синдикалната организација.

Побарани се средби и со најголемата банка-доверител за помош да се пронајдат евентуални нови инвеститори, кои би ја преземале компанијата и би го овозможиле нејзиното работење, како и состанок со  со градоначалникот на Кавадарци Митко Јанчев и пратениците кои доаѓаат од оваа општина.

- Доколку не наидеме на разбирање и прием од наведените институции ние како СО на „Еуроникел индустри“ заедно со нашите вработени, ќе бидеме принудени да преземеме непопуларни мерки како протести и разни блокади на институции и патишта, а се со цел да се избориме за функционирање на компанијата и обезбедување на нашата егзистенција, додаде Ѓорѓиев

Синдикатот на ,,Еуроникел индустри" претходно со допис до директорот Димитрис Пасос и бордот на ГСОЛ,  бара продолжување на производството во фабриката во Кавадарци. Печката само се грее, но не произведува, а вработените стравуваат за судбината на колективот.