Симптоми
Сувата кожа е обично привремен проблем што се појавува само за време на зимскиот период, но постојат случаи и кога тој проблем трае цел живот. И иако кожата е обично најсува на рацете и долниот дел од нозете, ова може да биде различно кај секој човек.
Симптомите на сува кожа зависат од вашата возраст, местото на живеење, времето кое го поминувате надвор и причината за проблемот.
Доколку имате сува кожа, ќе забележите еден или повеќе од овие симптоми:
· Затегнатост на кожата, особено по капење, туширање или пливање
· Кожа која изгледа збрчкано и дехидрирано
· Кожа која изгледа грубо наместо мазно
· Чешање, кое понекогаш може да е многу силно
· Слабо или интензивно лупење на кожата
· Линии или пукнатини во кожата
· Црвенило
· Длабоки пукнатини кои понекогаш може да крварат
Кога да појдете на доктор
Повеќето случаи на сува кожа се подобруваат со мали промени и домашни лекови. Посетете го докторот доколку:
· Состојбата на кожата не се подобри и покрај вашите напори
· Сувата кожа е придружена од црвенило
· Сувоста и чешањето ви го пореметуваат сонот
· Имате отворени рани од чешање
· Претерано ви се лупи кожата
Причини
Иако причините за сува кожа (ксероза) речиси секогаш може да се пронајдат во околината, постојат и одредени болести кои можат да го променат изгледот на вашата кожа. Причини за сува кожа може да бидат:
· Времето. Генерално, кожата е најсува за време на зимските денови кога температурата и влажноста се ниски. Зимските услови понекогаш ги влошуваат и веќе појавените проблеми со кожата. Вакви проблеми може да се појават и ако живеете во место каде температурите се високи но нивото на влажноста е ниско.
· Греење. Парното греење, греалките, камините и печките на дрва го сушат воздухот и ја сушат кожата.
· Топли бањи и туширања. Пречестото туширање или капење, посебно кога тоа долго трае а водата е премногу топла, ги руши липидните бариери на вашата кожа. Истото го прави и честото пливање, посебно во вода со високо ниво на хлор.
· Силнисапуни. Многу популарни сапуни ги одземаат липидите и водата од вашата кожа. Дезодорансите и антибактериските сапуни се најштетни како и многу шампони кои ви го сушат скалпот.
· Изложеност на сонце. Како и сите видови на топлина, така и сончевата топлина ја суши кожата. Но штетата од ултравиолетовите зраци продира подлабоко од површинскиот слој на кожата (епидермис). Најголемата штета се случува длабоко во дермисот, каде колагенските и еластинските влакна се оштетуваат многу побрзо резултирајќи со длабоки брчки и попуштена и незатегната кожа (solar elastosis). Кожата оштетена од сонцето може да изгледа исто како сувата кожа.
· Атопичен дерматит. Ова е најчестиот вид на егзема и обично најпогодени делови се лицето, страничните делови на вратот, деловите околу лактите, глуждовите и колената.
· Псоријаза. Оваа состојба е карактеристична по брзото натрупување на тврди, суви и мртви кожни клетки кои создаваат дебели красти.
· Тироидни нарушувања. Хипотиреоидизмот, состојба која се појавува кога тироидата создава многу малку тироидни хормони, ја намалува активноста на потните и масните жлезди а тоа води до груба и сува кожа.
Ризични фактори
Иако сувата кожа може да се појави кај секого, шансите за нејзино појавување се поголеми:
· Ако сте постари
· Ако живеете во сува и ладна клима
· Ако пречесто се капете или туширате
Компликации
Кај лицата кои имаат поголема склоност кон егзема, нетретираната сува кожа може да доведе до:
-Атопичен дерматит. Доколку имате склоност кон оваа болест, сувата кожа може да доведе до нејзино активирање, предизвикувајќи црвенило, пукнатини и воспаление.
- Фоликулитис. Воспаление на фоликулите на влакната.
-Целулитис. Ова е сериозна бактериска инфекција на кожните ткива каде бактериите навлегуваат во лимфниот систем и крвните садови.
Овие компликациии се случуваат ако системите за заштита на кожата ви се нарушени. На пример, претерано сувата кожа може да предизвика пукнатини кои може да се отворат и да крварат со што им го отвораат патот на бактериите.
Терапии и лекови
Во повеќето случаи, сувата кожа се негува со хидратантни креми и со избегнување на чести и долги капења и туширања. Во некои случаи докторот може да ви препорача крема која содржи лактична киселина или лактична киселина и уреа.
Понекогаш, сувата кожа може да доведе до дерматит и тогаш докторот препишува лосион со хидрокортизон. Доколку ви се појават пукнатини можете да ставате влажни облоги со средство кое би спречило инфекција.
Начин на живот и домашни лекови
Иако не можеме да имаме беспрекорна кожа, следниве мерки би помогнале во одржување на кожата влажна и здрава:
· Употребувајте хидратантна крема. Хидратантната крема создава заштитен слој над кожата кој ја спречува водата да излезе. Ако кожата ви е премногу сува, употребувајте бебешка масна крема која ќе го спречи испарувањето на водата од кожата.
· Употребувајте млака вода и намалете го времето за капење. Топлата бања и честото капење ги отстрануваат маснотиите. од вашата кожа. Намалете го капењето на 15 минути или помалку и употребувајте млака наместо топла вода.
· Избегнувајте сапуни кои ја сушат кожата. Доколку имате сува кожа, употребувајте сапуни и шампони кои содржат состојки што ја хидратизираат кожата. Избегнувајте дезодоранси и антибактериски сапуни. Можеби ќе треба да испробате повеќе производи додека не го најдете вистинскиот. Важно е кожата по миењето да ви биде мека а не сува и затегната.
· Нанесете крема веднаш по капењето. По капењето, нежно избришете го лицето за да оставите барем малку влажност на него. Веднаш потоа нанесете крема за да ја “заробите” водата во клетките.
· Употребувајте развлажнувач на воздух. Топлиот и сув воздух може само да го влоши лупењето на кожата. Изберете развлажнувач кој можете да си го дозволите и секогаш одржувајте го чист за да се заштитите од бактерии и габи.
· Употребувајте материјали кои се добри за кожата. Природните материјали како памук и свила и овозможуваат на кожата да дише. Но волната, иако природна, може да ја иритира кожата. Кога ја перете облеката, употребувајте детергенти без бои и парфеми бидејќи и тие ја иритираат кожата.
Доколку овие мерки и употребата на креми со хидрокортизон не ви помогнат, посетете доктор или разговарајте со дерматолог.