Сите инспекторати ќе пломбираат со лента: Затворање и казна на самото место
Објавено во: Економија 13 Октомври, 2020
Лента со натпис „Привремена забрана за вршење на дејноста“, заверена со печат на инспекциската служба, потпис на инспекторот и дата на поставување ќе се запечатува на угостителските објекти и производните капацитети, според предлогот за законските измени за заштита на населението од заразни болести, кој веќе е доставен до Собранието и ќе се носи по скратена постапка.
Со новите законски измени, овластување за изрекување на забрана за работа и прекршочен платен налог, кои до сега ги имаше само Државниот здравствен и санитарен инспекторат, добиваат и пазарниот, трудовиот и инспекторатот за транспорт, како и другите инспекторати на централно и локално ниво. Тоа значи дека ќе бидат опфатени сите угостителски објекти, превозници, производствени капацитети, маркети кои не ги почитуваат здравствените протоколи и мерки.
Овие инспекциски служби може да изречат привремена забрана за вршење на дејноста во траење од 10 до 30 дена и тоа веднаш со усно решение а во рок од три дена ќе треба да го донесе и писменото решение, додека евентуална жалба од сопственикот тоа нема да го одложи.
Казните кои инспекторатите сега ќе можат директно да ги изречуваат се до 3.000 евра за микро, до 6.000 евра за мал, до 18.000 евра за среден и до 30.000 евра за голем трговец. Глобата за одговорното лице ќе биде 1.500 евра, 750 евра за трговец поединец а 250 евра за вработениот. Инспекторите ќе мора веднаш да издадат прекршочен платен налог доколку се утврди непочитување на мерките против Ковид-19, пишува во предлог-законот.
- Со овие измени сите инспекциски служби добиваат нови, поголеми овластувања за справување со прекршителите на КОВИД протоколите. Досега само Државниот здравствен и санитарен инспекторат имаше овластувања да изрекува мерки, а другите инспекциски служби само поднесуваа кривични пријави за непочитување на протоколите согласно Кривичниот законик, рече вицепремиерот Љупчо Николовски при најавувањето на законските измени.
Следно во Собранието што претстои е законодавно-правната комисија да утврди пречистен текст на Законот за заштита на населението од заразни болести а ќе се обезбедат и усогласени одреби со Законот за инспекциски надзор и Законот за прекршоци.
А.К.