Сите што имаат пари на Кипар одат 10 % во минус, земјата пред сериозен финансиски потрес

Во обраќањето до нацијата коешто во неделата доцна навечер го пренесуваше кипарската јавна телевизија, претседателот Николас Анастасиадес рече дека морал да ги прифати даноците на банкарските депозити во замена за меѓународната помош, бидејќи во спротивно Кипар ќе биде соочен со многу веројатен банкрот. „Решението што го договоривме не е она коешто го посакувавме, но е најмалку болното во оваа ситуација", рече Анастасиадес. Министрите за финансии за 17-те земји членки на еврозоната се договорија за пакет помош за Кипар во износ од 10 милијарди евра, за да ја спасат земјата од банкрот. Кипарскиот парламент за утре ја одложи итната седница на која требаше да се расправа за контроверзниот данок на банкарските депозити. Станува збор за еднократен данок од 6,7 отсто што граѓаните треба да го платат, ако на банкарските сметки имаат помалку од 100.000 евра. Данокот за поголемите банкарски депозити пак, е 9,9 отсто. Ова беше договорено во петокот, со претставниците на Европската унија и меѓународниот монетарен фонд, што предизвика револт во јавноста. По веста за воведувањето на даноците, дел од граѓаните на Кипар побрзаа да ги извадат парите, што може да предизвика колапс во системот на банкоматите. За возврат, Кипар мора да го сопре дефицитот, да го намали банкарскиот сектор кој настрада поради во прв ред поради неговата преголема изложеност на грчкиот јавен долг, и да ги зголеми данок. Како сево ова ќе се одрази на европската економија ќе видиме веќе утре со отворањето на берзите.