СИТУАЦИЈАТА Е НЕСТАБИЛНА, СЕ ВОДАТ ЖЕСТОКИ БОРБИ: Руската војска навлезе и во градот Торецк

Добивај вести на Viber

Руската војска навлезе и во градот Торецк во Донбас. Медиумите пишуваат дека Русите веќе се на источната периферија на градот. 

Ова се случува помалку од една недела по падот на градот Вухледар.

„Ситуацијата е нестабилна, борбите се водат буквално на секој влез (во градот)“, изјави за украинската национална телевизија Анастасија Бобовникова, портпарол на Оперативната тактичка група „Луганск“.

Засега нема коментар од руското Министерство за одбрана, кое претходно во понеделникот соопшти дека нивните сили нанеле штета на жива сила и опрема во близина на неколку населени места. 

Руски воени блогери, вклучително и група воени аналитичари кои го водеа познатиот канал на Телеграм „Рибар“, рекоа дека руските трупи продолжуваат да напредуваат кон центарот на градот.

За Украина, Торецк е град на првата линија веќе 10 години, бидејќи е блиску до териториите на Украина кои беа заземени од сепаратистите поддржани од Русија во 2014 година. Украина бара повеќе оружје од Западот. Трансферот на авионите Мираж 2000 од Франција во Украина би можел да почне во првата половина на 2025 година. 

Европската Унија(ЕУ) денеска најави воспоставување нови рамковни услови за воведување санкции против Русија поради нејзините обиди да ја дестабилизира ситуацијата во земјите-членки на ЕУ. Русија ја нападна Украина на 24 февруари 2022 година и војната уште трае.