Скандал со лажни дипломи ја тресе Шпанија

Добивај вести на Viber

Во последните неколку недели, Шпанија е сведок на лавина на оставки и контроверзии, предизвикани од откритието за лажни дипломи и неточни биографии во политичките редови. Сè започна со признанието на една млада надежна кандидатка од шпанската Народна партија (ПП), која призна дека нејзината биографија не била целосно точна. Ноелија Нуњез, 33-годишна членка на раководството на ПП, изјави дека не дипломирала на два факултета, право и јавна администрација, што предизвика лавина од реакции.

Таа се извини и поднесе оставка, потег што ретко се гледа во Шпанија.

„Им се извинувам на сите оние што беа разочарани, но верувам дека само извинувањето не е доволно“, рече таа во тоа време.

Но, нејзиното каење предизвика верижна реакција. Сè поголем број политичари од различни партии побрзаа да ги корегираат своите биографии, честопати потценувајќи ги претходните тврдења за нивното образование. Некои, како Нуњез, поднесоа оставки.

Лавина реакции

Примерот оваа недела е Ана Милан, според Гардијан, висок функционер во регионалната влада на Мадрид, која ја води ПП. Таа призна дека во нејзината официјална биографија погрешно била наведена диплома по политички науки, кога всушност имала само диплома по јавна администрација.

Во регионот Екстремадура, член на крајно десничарската партија Вокс, Игнасио Игера, морал да го повлече своето тврдење дека има диплома по маркетинг откако било откриено дека универзитетот што го навел дури и не ја нудел програмата во тоа време. Тој поднел оставка.

Социјалистот Хозе Марија Анхел, кој ја координирал закрепнувањето по катастрофалните поплави во Валенсија минатиот октомври (во кои загинаа 220 лица), исто така поднел оставка откако бил обвинет за фалсификување диплома за да добие работа во јавната администрација.

Во истиот регион, партијата морала да ја корегира биографијата на Пилар Бернабе, претставник на регионалната влада, откако било откриено дека таа никогаш не ги завршила студиите по шпанска лингвистика и аудиовизуелна комуникација.

Историјата на лажните дипломи во шпанската политика

Претседателот на Андалузија, Хуан Мануел Морено (ПП), се соочил со прашања во врска со различните верзии на неговото образование. Во 2000 година, тој тврдеше дека има диплома по менаџмент, во 2004 година ова беше променето во „студии по менаџмент“, а во 2008 година тврдењето еволуираше во магистерска диплома.

Претседателот на Сенатот, Педро Ролан, исто така од Народната партија, мораше да ги отстрани тврдењата за диплома и магистерска диплома по маркетинг откако беше откриено дека универзитетот на кој студирал не издавал такви дипломи.

Најпознатиот случај, сепак, датира од 2018 година. Кристина Сифуентес, тогашна претседателка на регионалната влада на Мадрид од Народната партија, тврдеше дека има магистерска диплома од Универзитетот „Крал Хуан Карлос“, иако никогаш не посетувала часови ниту напишала теза.

Кога се обиде да го докаже тврдењето со сертификат, двајца од тројцата потписници на документот изјавија дека нивните потписи се фалсификувани. Нејзината кариера заврши кога беа објавени снимки од надзорните камери на кои се гледа како обезбедувањето ја пребарува нејзината чанта откако наводно украла две тегли крем за лице.

Сифуентес тврдеше дека тоа е „ненамерна грешка“, но сепак поднесе оставка, сакајќи, рече таа, да ја поштеди својата партија и семејство од понатамошен срам.