Скопје го поплавија 37 литри на метар квадратен, нови врнежи денеска!

Добивај вести на Viber

Во Скопје вчера наврнаа 37 литри на метар квадратен за половина час, а дуваше и ветар со брзина од 70 километри на час, соопшти Управата за хидрометеоролошки работи. И за денеска попладне метеоролозите најавуваат пороен дожд и грмежи, особено во западните и југозападните делови од земјата, а одредена стабилизација на времето се очекува утре и во среда. Силното невреме што синоќа ја зафати Македонија поплави одредени делови во градот и го отежна сообраќајот. Координативното тело на Владата, предводено од министерот за транспорт и врски Миле Јанакиески и градоначалникот Коце Трајановски заседаваше синоќа и посетија неколку критични точки. Невремето предизвика проблеми во снабдувањето со електрична енергија, затоа што во неколу трафостаници изби краток спој. Од удар на гром, пак, пукна и гасовод во Ново Лисиче. Екипи на јавните претпријатија ЕВН и ГАМА од синоќа се на терен во обид да се санираат дефектите. Во Ново Лисиче два паркирани автомобила пропаднаа во дупка, што се отвори по вчерашното невреме. Според првичните сознанија, возилата пропаднале кога се одронила земја во градежната дупка зад бензинската пумпа на Окта, на булевар „Србија“. Синоќа Скопје го погоди и земјотрес, кој според Сеизмолошката опсерваторија на Природно-математичкиот факултет потекнува од скопското епицентрално подрачје, со јачина од 5-6 степени според Европската макросеизмичка скала.