Славчо Попоски најавува студ од север, дождови, но и снег
Објавено во: Македонија 02 Март, 2022
Метеорологот Славчо Попоски најавува студ од север, дождови, но и снег.
Вели дека првата половина од март месец ќе биде постудена и релативно со просечни врнежи (се очекува и дожд и снег), додека втората половина ќе биде нешто потопла, и истата ќе не потсеќа дека доаѓа пролетта.
„Инаку во првата половина од март почесто ќе паѓа снег и на некои од пониските места, а можно е да се формира и нова снежна покривка, додека на повисоките и планинските места истата ќе се зголемува. Температурите би биле потпросечни за првата половина од март месец и би се искачувале во интервалот само од 1 до 8 степени, особено за време на викендот кој доаѓа. Минималните пак ќе се спуштаат под нулата на повеќе места, а некаде истите се очекува да се спуштат дури и до -10 степени, што е доста ниска температура за март месец“, објаснува Попоски.
Додава дека веќе од втората половина на март, па натаму барем според сегашните анализи ќе биде се потопло и полека, но сигурно пролетта ќе почне да ни чука на врата.