Со 15 милиони евра ќе се поддржува развојот на семејни бизниси во руралните средини

Добивај вести на Viber

Со средства во износ од 15 милиони евра Владата ќе поддржи отворање нови или проширување на постојните семејни бизниси во руралните средини. Оваа поддршка ќе се доделува за бизниси од областа на земјоделското производство, алтернативно земјоделско производство, занаетчиство, туризам и услужни дејности.

Како што појасни на денешната прес-конференција портпаролот на Владата Александар Ѓорѓиев, средствата ќе бидат наменети за покривање на 50 проценти од инвестицијата за отворање или развој на семејните бизниси. Најмала инвестиција за која граѓаните ќе можат да побараат поддршка е во висина од 3.000 евра, а Владата ќе покрие половина или 1.500 евра, а највисоката сума може да достигне до 300 до 400 илјади евра од кои половина како поддршка ќе ги обезбеди Владата.

За анимирање на граѓаните Владата подготвува кампања во која претставници на Агенцијата за финансиска поддршка на земјоделството и Агенцијата за вработување на Република Македонија на терен ќе им објаснуваат во кои се сфери може да се добие поддршка од Владата и помош при изготвувањето на бизнис-плановите. Основен услов кој треба да го исполнат граѓаните за да добијат финансиска поддршка од Владата покрај бизнис-планот е да ги имаат исполнето обврските по основ на даноци и придонеси, и да се од руралните средини.

Приоритет во добивањето на средствата ќе имаат оние бизниси кои ќе овозможат поголем број вработувања.