Собрание: Мицкоски не е ниту пратеник, ниту државен функционер за да биде поканет
Објавено во: Македонија 13 Мај, 2019
Собранието денеска објави дека не го поканила лидерот на ВМРО-ДПМНЕ на вчерашната попладневна инаугурација и свечена заклетва на новоизбраниот претседател на Македонија, Стево Пендаровски, затоа што не е нуту пратеник, ниту државен функционер.
Според собраниската служба, на инаугурации на претседатели нема пракса да се канат лидери на политички партии кои не се пратеници, туку само носителите на високи државни функции се канеле по пресеанс листа, додека Министерството за надворешни работи ги поканува странските гости. Сепак, на свеченоста присуствуваа и верски лидери, претседателот на МАНУ и поранешни претседатели на Македонија.
„Досега до претседателот Мицкоски нема упатено покана за присуство на денешниот настан. Претседателот Христијан Мицкоски денот ќе го помине стандардно, со утринска прошетка и искачување на Водно, потоа продолжува со работни ангажмани во седиштето на партијата, каде има однпаред закажани средби и состаноци. А, попладне ќе биде со своето семејство“, објавија вчера од ВМРО-ДПМНЕ.
Мицкоски лани сакаше да се обрати од собраниската говорница за време на уставните промени согласно Преспанскиот договор, но не ја доби потребната дозвола. Спикерот Талат Џафери тогаш изјави дека писмото со барање било непрописно испратено.