СОПИШТЕ ЗАБОРАВЕНО: Реконструкцијата на патот дури после избори!

Добивај вести на Viber

Регионалниот пат во Сопиште што повеќе од една година е уништен поради поставување на канализација за населбата Сончев град – ќе биде саниран. Но, дали тоа ќе биде комплетна реконструкција како што тврди власта или пак само евтина шминка, како што смета опозицијата повикувајќи се на описот за реконструкција од објавениот тендер, ќе се знае дури после изборите закажани за јуни годинава. ЈП за државни патишта пред три дена го објави тендерот за рехабилитација на регионалниот пат во Сопиште, а според најавите во најдобра варијанта, доколку нема жалби на тендерската постапка, работите на терен би започнале дури после три месеци. „Се работи за седум километри пат, а инвестиција е 500 илјади евра. Очекувам дека следниот месец тендерската постапка да заврши,  а потоа потпишуваме договор и започнуваме со работа. Сепак, не можам да дадам детален одговор, кога ќе заврши постапката. Се надевам дека ќе нема жалби од компаниите, но најмногу за три месеци очекувам да се почне со работа на терен ,изјави министерот Владо Мисајловски. Но, дел од градежниците објаснуваат дека ако се погледне тендерската постапка, може да се види дека ќе се гребе асфалт и ќе се поставува нов, и дека ќе има корекции на одредени делови од посочениот пат, што пак укажува дека не станува збор за сериозна инвестиција. Бочварски: Владата прави само „евтина шминка“ со рехабилитацијата на патот кон Сопиште Состојбата во која се наоѓа овој регионален пат, јасно укажува дека таму е потребна сериозна инвестиција, но описот во тендерската документација укажува на тоа дека овој пат ќе претрпи само незначителна реконструкција. „Гледaјќи ги активностите кои што се предвидени да се работат на овој патен превец, предвидената сума и критериумите кои се дадени во тендерската постапка за реконструкција на овој патен правец  кој е долг 7 километри, можам да кажам дека се работи за евтина шминка на ВМРО ДПМНЕ пред избори. На тој пат му треба сериозна реконструкција, за долгорочно решавање на проблемот. Сепак се работи за пат преку кој се движат 8 до 10 илјади граѓани, вели за „Фактор“  Благој Бочварски претседател на Комисијата за транспорт во СДСМ. Според Бочварски, со вакви ад хок решенија не им се помага на граѓаните, напротив за две до три години повторно ќе се појави истиот проблем. „Тогаш таа реконструкцијата ќе ги чини граѓаните неколкукратно повеќе, бидејќи веројатно ќе има многу посериозни оштетувања на долниот строј. Апелирам да се пристапи најсериозно на овој проблем, но и на сите слични проблеми во државата, додава Бочварски, потенцирајќи дека по изборите што треба да се одржат СДСМ како владејачка партија системски ќе пристапи кон сите вакви проблеми, но и ќе понуди долгорочни решенија преку вистинска изградба и реконструкција патната инфраструктура во Македонија. Кој дозволи регионалниот пат да се остави една година во небезбедна состојба? Но, за проблемите со регионалниот пат во Сопиште револтирани се и граѓаните кои секојдневно патуваат на оваа релација. Посочуваат дека повеќе од една година состојбата на патот е катастрофална, а се вози како во хорор филм. „Чиста среќа е што, досега немаше поголеми проблеми на овој пат. Инаку, тука еднаш веќе се преврте камион. Среќа немаше жртви. Но, никој не се грижи. Го оставија патот така“, вели еден од жителите на оваа населба. „Дојдоа од Владата тука, се шетаа, видоа и си заминаа. А постојано се фалат дека прават патишта. Еве гледаме колку градат. Нека дојдат тука да возат секој ден, па да видат колку градат, да видат како е да се вози по патиштата кои тие велат дека ги градат“, додава друг жител. „Копаа, прекопуваа. Ставаа канализација. Ама изгледа нешто згрешија, па повторно пак копаа. И оставија вака, кога врне станува се полошо. Едната лента целосно ја нема. Само во една возиме. А цел пат е кривини, додава жител на Сопиште.   Проблемите со овој пат настанаа, кога  поради изградба на фекална каналзиација за населбата Сончев град, едната лента од овој регионален пат беше целосно ископана, и наместо патот да се врати во првобитната состојба, беше поставен асфалт, кој за многу краткко време повторно целосно е инуштен, а патот е комлетно пропаднат. За овој проблем, кој со месеци се провлекува, Фактор пишуваше и минатата година во септември, а тогаш од Министерството за транспорт и врски посочија дека патот ќе биде готов за две недели. Но, очигледно е дека санирањето беше направено само површно, бидејќи делот што тогаш беше асфалтиран за кратко време повторно пропадна, но остана и дел од патот кој воопшто не беше асфалтиран. На овој пат, работеше градежната компанија Жикол, која со Министерсвото за транспорт и врски на 15 август 2014 година склучи договор за изгрдба на фекална канализација во населено место Сопиште и локалитет „Сончев Град“ и одведување на отпадните води низ општините Аеродром и Кисела Вода по принцип „клуч во раце“. За овој договор Жикол ќе добие близу 4,8 милиони евра, а работата требаше да ја заврши за 18 месеци, односно во јануари годинава. Министерството за транспорт и врски, во септемрви 2014 година,  за сума од 95 илјади еврасклучи и договор со фирмата ГЕИНГ Кребс унд Кифер Интернешнл и др.ДОО Скопје , која треба да врши надзор над работата Жикол. Останува нејасно, кој и зошто дозволи регионалниот пат кој општина Сопиште ја поврзува со градот Скопје да остане цела година во катастрофална состојба, и зошто ниту Министерството за транспорт и врски, и покрај серијата апели и укажувања, ниту компанијата избрана да врши надзор врз работата на Жикол, не превзема мерки, со кои патот ќе мора да биде вратен во нормална состојба, а не целиот да биде оставен во состојба која е далеку од безбедна за сообраќај. Светска банка:Македонија не одвојува доволно пари за одржување на патиштата И додека изминативе месеци власта постојано посочува дека е започната инфраструктурна офанзива со изгрдба на неколку автопати, вредни една милијрда евра, Светска банка предупредува дека земјава не одвојува доволно пари за одржување на патиштата. Оттаму нотираат дека се започнати сериозни инвестиции во инфраструктурата, но исто така предупредуваат дека, не одвојуваме доволно пари за постоечката инфрастртруктура, која посред банката дури 60% е во лоша состојба. Токму таков е примерот со регионалниот пат во Сопиште, односно, додека власта се фали со милијрда евра инвестиции во автопати,  посочениот регионален пат, кој го користат десетина илјади граѓани, веќе една година е оставен да пропаѓа. С.Н.