Србија: Чоколадите на пазар повкусни од оние во продавница

Добивај вести на Viber

Поради шверц на чоколади и колачи од околните земји Србија годишно губи 1,5 милиони евра, пренесува весникот Вечерње новости.

Весникот пишува дека увозните чоколади и кремови се до 30 отсто поефтини на пазар отколку во продавници,  а оригинални милка чоколади, нутела кремови, јакобс и нескафе, но и рафаело колачите, разни кремови и конзерви се продаваат на тезги на секој зелен пазар во Србија, по цена и до 30 отсто пониска од продавниците и со добар рок на траење. Овие производи трговците најчесто ги купуваат во пограничниот регион на Унгарија, каде што има голем број странски дисконтни продавници, кои имаат конкурентни цени, но и чести акции, а поретко од Романија и Бугарија. „Само врз основ на нелегален увоз и сивиот пазар државата годишно губи од милион до милион и пол евра, бидејќи се избегнува плаќање на данок и царина“, вели Дејан Симиќ од компанијата Крафт фуд, која меѓу другото произведува и дистрибуира милка чоколади. „Се работи за класичен шверц. Во пограничниот дел на Унгарија, на пример има многу дисконтни продавници, каде купувачите добиваат одредено враќање на данокот на додадена вредност, не плаќаат царина која сега изнесува околу 10 отсто и тука секако има простор за добра заработка“, истакнува Симиќ кој додава и дека потрошувачите се задоволни, оти сметаат дека добиваат квалитетна увозна стока, по пониски цени. Сепак, граѓаните имаат свое оправдување и според нив купувањето од тезга станува тренд бидејќи растот на цените не е ист со растот на платите, пренесува весникот.