Србите со двојни државјанства сепак ќе примат вакцина во Србија

Добивај вести на Viber

Повеќето Срби кои живеат во Македонија, но поседуваат двојни државјанства, сепак ќе се вакцинираат во Србија, каде процесот веќе тече успешно и на располагање на граѓаните се повеќе вакцини.

Тие не ги прекинале врските со матичната држава од каде потекнуваат и каде имаат имоти. Македонија каска во процесот на имунизација и македонските граѓани малку ќе почекаат додека да стигнат вакцините и да почне вакцинацијата. Жарко Николиќ, медиумски работник кој има двојно државјанство вели дека десетина негови познаници веќе се вакцинирале во Србија, и тој планира да го стори истото.

„Треба да се има српско државјанство, адреса во Србија за да се овозможи вакцинација. Пријавувањето е онлајн, се избира која вакцина сака да ја прими граѓанинот, а сега е многу популарна кинеската вакцина. Моите роднини велат дека во Владичин Хан нема гужва, но јас прележав ковид и планирам да ја примам вакцината летово“, вели Николиќ.

Гордана Јовиќ Стојковска од Српската заедница во Македонија исто така планира да се вакцинира во соседна Србија.

„Планирам да се вакцинирам, најверојатно со вакцината Спутник, но тоа ќе го направам понатаму“,  вели таа.

Но, има и граѓани кои сѐ уште не размислувале на оваа тема. 

„Не сум размислувала многу за вакцинацијата и не ми е приоритет. Може да се случи утре да отидам во Врање и да ја примам вакцината, а може и да не одам. Тоа е личен избор на секој поединец. Кога ќе започне вакцинирањето кај нас е обврска на државата и за тоа немам став. Јас избегнувам комуникација со други луѓе, внимавам да не се заразам“, објаснува Србинка која живее во Куманово.

Србија се покажа како многу успешна во процесот на вакцинација, со што надмина многу други земји во светот. Досега во Србија против коронавирус се вакцинирани скоро половина милион граѓани. Со ова Србија е втора во Европа според бројот на вакцинации на милион жители. Само Велика Британија е пред Србија, по што следуваат Малта, Исланд, Данска, Ирска, Словенија, Романија. Властите велат дека Србија е многу блиску до победа на коронавирусот, а во земјата ќе се произведува и руската вакцина. Србите можат да бираат дали ќе примат руска, кинеска или Фајзер вакцина.

foto freepik