СТАТИСТИКА: Новороденчиња се помалку, а бројот на починати лица расте
Објавено во: Македонија 26 Мај, 2017
Во Македонија се намалува бројот на родени деца, а бројот на починати расте.
Бројот на живородените деца во првото тримесечје од 2017 година, во споредба со истиот период од претходната година, е намален за 3.6% и изнесува 5 340 живородени деца.
Бројот на умрените лица во првото тримесечје од 2017 година бележи зголемување од 11.6% во споредба со истото тримесечје од 2016 година и изнесува 6 132 лицa, а од нив 67 се умрени доенчиња, стои во соопштението на Државниот завод за статистика.
Во Скопје се родени 1607 деца, во Битола 194, во Велес 137, во Гостивар 165, Кавадарци 108, Куманово 310, Охрид 130, Прилеп 172, Струга 157, Струмица 159, Тетово 268, Штип 137, а другите се со помал број на родени деца.
Бројот на склучените бракови во ова тримесечје од годината е намален за 7% во споредба со истиот период од 2016 година и изнесува 2 566 бракови. Разведените бракови во ова тримесечје од годината бележат намалување од 21.8% во споредба со истиот период од 2016 година и нивниот број изнесува 519.