Стигнаа приговори за Брвеница, Карпош и Шуто Оризари: ДИК ќе ги разгледува утре

Добивај вести на Viber

До денеска претпладне до Државната изборна комисија (ДИК) се поднесени 16 приговори за постапката на сумирање и утврдување на резултатите од вториот круг на локалните избори, одржани на 2 ноември. Рокот за поднесување на приговори завршува денеска во 16:30 часот, односно 48 часа по објавувањето на првичните резултати.

Приговори поднел Хаким Рамадани поддржан од ВЛЕН за избирачките места 2032, 2033, 2034 и 2035 во Брвеница. Во оваа општина во вториот круг победи Јовица Илиевски поддржан од ВМРО-ДПМНЕ со 4.374 гласа, додека Рамадани освои 4.224 гласа.

Коалицијата „Твоја Македонија“ поднела десет приговори за избирачките места 2955, 2956, 2956/1, 2959, 2959/1, 2961, 2961/1, 2971, 2971/1 и 2973 во Шуто Оризари. И Сојузот на Ромите поднел приговори за избирачките места 2961, 2962 и 2966 во истата општина. Во Шуто Оризари победник во вториот круг е Курто Дудуш од Унијата на Ромите со 3.894 гласа, додека Ерџан Демир од коалицијата поддржана од ВМРО-ДПМНЕ добил 3.406 гласа.

Коалицијата „Искуство за успех“, која го поддржуваше Стевчо Јакимовски, поднела приговори за сумирање и утврдување на резултатите на избирачките места 2613 и 2631 во општина Карпош. Таму победник е кандидатот поддржан од ВМРО-ДПМНЕ и коалицијата, Сотир Лукровски, со 13.512 гласа, додека Јакимовски освои 12.378 гласа.

Според информациите од ДИК, седницата за одлучување по приговорите најверојатно ќе се одржи утре.