Субрата Рој го урна митот за индискиот милијардер: Сè што имам се 970 илјади долари!

Добивај вести на Viber

Иако беше претставен како милијардер и голем инвеститор, Субрата Рој шефот на конгломератот „Сахара“, на сослушувањето пред моќниот регулатор на пазарот СЕБИ изјави дека неговиот имот е помал од 1 милион долари. Како што пренесува Утрински весник,  Субрата Рој е заплеткан во битка со индискиот регулатор СЕБИ околу обвинувањата дека со шемата на обврзници измамил милиони граѓани. Претходно регулаторот му нареди на „милијардерот“ на специјално сослушување да ги соопшти податоците за неговиот капитал. Истовремено СЕБИ ја обвини „Сахара груп“, која е најпозната како главен спонзор на индискиот крикет тим, дека собрала милијарди долари од 110 милиони мали инвеститори во забранета финансиска шема и потоа не успеала да ги рефундира парите и покрај наредбата на судот. За време на сослушувањето за имотот кој го поседува, Рој изјавил дека заедно со сопругата имале златен накит и драгоцени камења во вредност од 600.000 долари, фиксни депозити во вредност од 300.000 долари и 70.000 долари готовина и банкарски заштеди, односно вкупно 970.000 долари. „Тоа е се што го имам“, изјави Рој за новинарите по едночасовното сослушување во регулаторот на индискиот пазар. Скандалот од Индија ја затресе и Македонија. Пред само неколку месеци беше најавено дека во земјава индискиот милијардер ќе гради луксузен хотелски комплекс на брегот на Охридското езеро, инвестиција тешка стотина милиони долари. Дочекан од највисокиот државен врв , тој најави исградба и на грандиозен споменик на Мајка Тереза во Скопје. Иако индиските власти го обвинија за огромен долг, македонската Влада уверуваше дека неговите инвестиции во земјава непречено продолжуваат.