Свет без ѕидови – Како една приватна градинка создаде модел за иднината на образованието

Добивај вести на Viber

Преку менторската програма поддржана од АППРСМ и JICA, детската градинка „Светот на Колорес“ доби простор за уште поголем раст – овојпат со стратешка поддршка во менаџментот, визијата и европската поврзаност. Разговаравме со генералната менаџерка Билјана Караманолевска и менторката Светлана Киревска за искуствата, предизвиците и резултатите од процесот.

Г-ѓа Караманолевска, „Светот на Колорес“ звучи како нешто повеќе од обична градинка. Како ја изградивте оваа едукативна приказна?

Билјана Караманолевска: Навистина е така – „Светот на Колорес“ е место каде децата растат во боите на љубопитноста, креативноста и сигурноста. Сонот го започнавме со јасна визија: да создадеме простор каде секое дете ќе се чувствува прифатено и охрабрено да го истражува светот околу себе. Со тим кој континуирано се усовршува и програма заснована на современи методи и љубов кон природата, создаваме амбиент што поттикнува учење, раст и радост.

Г-ѓа Киревска, како го проценивте потенцијалот на оваа градинка кога ја запознавте?

Светлана Киревска: Веднаш беше јасно дека станува збор за институција која ги исполнува сите светски стандарди и е чекор пред времето. Тие не се само градинка, туку бренд кој ги поместува границите во образованието за деца од предучилишна возраст. Потенцијалот беше огромен, а ентузијазмот на тимот – заразен.

Зошто решивте да се вклучите во менторската програма и кои беа клучните аспекти на кои сакавте да работите?

Билјана Караманолевска: Веруваме во учење – не само за децата, туку и за нас како тим. Сакавме да добиеме надворешен увид, нови идеи и структура за нашата визија. Се фокусиравме на подобрување на менаџментот, организацијата, комуникацијата со родителите и интеграција на европски педагошки практики.

На што точно се фокусиравте како менторка?

Светлана Киревска: Пристапот беше сеопфатен. Во едукативната визија работевме на соработка со локални партнери и развој на концептот „училници без ѕидови“. Во делот на човечки ресурси, подготвивме модели за пристап до ЕУ програми и обуки за пишување апликации. Исто така, истражувавме можности за отворање прва шумска градинка – концепт кој би го проширил опсегот и иновацијата на Колорес.

Дали менторството ви помогна да ја прецизирате вашата методологија и организација?

Билјана Караманолевска: Да, и тоа значајно. Успеавме да структурираме методологија заснована на индивидуален пристап и активна педагогија. Подобривме внатрешната комуникација, воспоставивме систем за евалуација и забележавме зголемена доверба кај родителите. Родителите сега се поактивни, посигурни и се чувствуваат како дел од целиот процес.

Какви резултати забележавте од ваша перспектива?

Светлана Киревска: Тие веќе имаат видлив раст – отвораат нови објекти, тимот се усовршува, а методологијата е препознатлива. Верувам дека и менторскиот процес одигра важна улога во тој развој, давајќи структура и поддршка за нивниот веќе одличен ентузијазам.

Гледате ли простор за проширување на капацитетите?

Билјана Караманолевска: Апсолутно. Веќе сме во процес на отворање нова локација во општина Кисела Вода. Ова проширување е одговор на зголемената побарувачка и ќе го задржи истото ниво на квалитет, сигурност и љубов кон децата.

Како ја оценувате потребата за менторирање во приватниот образовен сектор?

Светлана Киревска: Потребата е голема. Образовните институции често имаат одлични програми, но им недостасува деловна поддршка. Менторството е начин тие да го реализираат својот полн потенцијал – преку подобро планирање, пристап до фондови и јасна структура.

Што би им препорачале на другите градинки или приватни образовни установи?

Билјана Караманолевска: Да не се двоумат. Професионалниот менаџмент е клуч за раст. Менторите не се критичари, туку партнери што носат свежа перспектива. Тоа е инвестиција што се враќа многукратно – во квалитет, во доверба и во одржлив развој.