Тони Блер е прескап, Србија ќе ја советува еден од неговите министри

Добивај вести на Viber

Поранешниот британски премиер Тони Блер сепак се покажал како прескап за да биде ангажиран за советник за евроинтеграции на српската Влада. Наместо него, Александар Вучиќ ќе го ангажира Питер Менделсон, поранешен министер во британската Влада. Според пишувањето на Дејли мејл, Србија „иако е на ивица на банкрот“ сепак е подготвена на поранешниот лабуристички министер да му понуди вносен договор, бидејќи ангажирањето на Блер се покажало прескапо. „Српскиот премиер Александар Вучиќ, некогашен близок соработник на Слободан Милошевиќ, веќе ги пречека Блер и Џонатан Пауел, поранешниот шеф на кабинет во Даунинг стрит, но сепак на крајот го сака господинот Менделсон за советник“, пишува весникот. Во текстот се додава дека Вучиќ, кој и самиот едно време работел како градежник во Велика Британија за две фунти на час, е свесен дека Блер и неговите некогашни колеги заработуваат милиони. Тој лично се видел со Менделсон пред една година, кога бил потпретседател на Владата, и уште тогаш му понудил соработка, но овој го одбил заради презафатеност. Сега имал намера пак да го повика и да ја обнови понудата. „Менделсон е најдобриот мотиватор што сум го видел во животот. Некои луѓе би рекле дека е мрачен, но тој е една силна, непобедлива личност, не можете да го исплашите, многу е влијателен и навистина може да биде ефикасен“, рекол Вучиќ. Сепак, дел од медиумите шпекулираат дека единствена причина за неангажирање на Тони Блер не е цената. Имено, Вучиќ наиде на остри критики кога се одлучи да му понуди да ја советува српската Влада за евроинтеграции, со оглед на тоа што поранешниот британски премиер беше еден од најгласните поддржувачи на НАТО бомбардирањето на Србија, за што доби и одликување на Косово.