Трајковски се уште недостапен, Мицкоски тврди дека не е испратен од ВМРО-ДПМНЕ
Објавено во: Македонија 13 Декември, 2018
Александар Трајковски се уште е телефонски недостапен за новинарите, а Христијан Мицкоски, лидерот на ВМРО-ДПМНЕ денес изјави дека тој не е испратен од партијата да го придружува поранешниот македонски премиер Никола Груевски во Будимпешта.
Трајковски, инаку советник во општина Гази Баба и вработен во Царинската управа, пред два дена беше фотографиран низ улиците на Будимпешта заедно со Груевски, кој таму пребега и доби азил пред почетокот на ослужувањето на неговата двегодишна затворска казна за случајот „Тенк“.
- Да се фокусираме на решавање на реалните проблеми на граѓаните и да гледаме државата да оди напред, наместо да го коментираме ова реално шоу и војарески клипови. Тоа ниту ќе даде вредност на квалитетот на животот, ниту ќе направи нешто добро за државата - рече Мицкоски.
Ги упати новинарите директно да го прашаат Груевски во врска со неговата логистика во Будимпешта, користењето возило со личен шофер и посетувањето елитни ресторани.
-Треба да го прашате Груевски за тоа. Претпоставувам ќе ви даде ссодветен одговор. Лично, како Христијан Мицкоски и претседател на ВМРО-ДПМНЕ, немам коментар, ниту знам кое е возилото или кој е шоферот – истакна Мицкоски одговарајќи на новинарски прашања по доделување на наградите на најдобрите 100 компании од Стопанската комора на северозападна Македонија.
Мицкоски нагласи дека досега немал никаква комуникација, ниту пак има сознанија дека некој од партијата се сретнал со Груевски.