ТРОШОЦИ ЗА ЖИВОТ: Кои производи и услуги поскапеа, а кои поевтинија?

Добивај вести на Viber

Минатиот месец трошоците на живот во однос на јуни годинава се намалиле за 0,3 проценти.

Во истиот период цените на мало се зголемени за 0,1 проценти. Податоците на Државниот завод за статистика покажуваат дека во однос на истиот период лани и трошоците за живот и на цените на мало  бележат намалување од 0,3 проценти.

Намалување на индексите на трошоците на животот во јули 2016 година, во споредба со претходниот месец, е забележано кај свежиот и разладен зеленчук освен компирот за 8,2 проценти, јајцата за 1 проценти, сирењата за 0,8 проценти, оризот, замрзнатата риба и млекото за 0,5 проценти, компирот за 0,4 проценти, другите пекарски производи, јогуртот и шеќерот, џемот, медот, чоколадата и кондиторските производи за 0,3 проценти.

Намалување на индексите на трошоците на животот е забележано и кај информатичката опрема за 2,3 проценти, течните горива и мазива за домаќинствата за 1,5 проценти, обувките и лековите за 1,2 проценти, цврстите горива за домаќинствата за 0,8 проценти. Другите медицински производи се намалиле за 0,7 проценти. Кај облеката и течните горива за домаќинствата е забележано намалување за 0,6 проценти, мебелот за домаќинствата за 0,3 проценти, материјалите за одржување и поправки на станот и електричната енергија за домаќинствата за 0,2 проценти.

Пораст на индексите на трошоците на животот во јули 2016 година, во споредба со претходниот месец, е забележан кај другите прехранбени производи за 1,5 проценти, другите преработки од риба и морски плодови за 0,9 проценти, сувото овошје и јаткастите производи за 0,6 проценти, свежото и разладеното овошје за 0,5 проценти, сушеното, соленото и чаденото месо и сушениот зеленчук, друг конзервиран и преработен зеленчук за 0,4 проценти и изнутриците за 0,3 проценти.

Во јули, исто така, пораст на индексите на трошоците на животот е забележан и кај авионскиот превоз на патници за 11,9 проценти, услугите за сместување за 9,1 проценти, туристичките пакет-аранжмани за 4 проценти, игрите и хобито за 3,5 проценти, средствата за чистење и одржување на станот за 1,9 проценти, гасот за домаќинствата за 1,5 проценти, социјалната заштита за 1 проценти.

Порастот кај средствата за лична хигиена и здравје е за 0,8 проценти, услугите за лична хигиена за 0,7 проценти, текстилот за домаќинствата, фотографската и кинематографската опрема и оптичките инструменти за 0,4 проценти, големите и малите електрични апарати за домаќинствата за 0,3 проценти.