Тутунски комбинат од Прилеп ќе произведува повеќе тутун, но ќе продава помалку цигари?

Добивај вести на Viber

Тутунскиот комбинат од Прилеп заедно со друштвата го објави планот за работа за годинава до Македонската берза. Друштвото ДООЕЛ Тутун планира зголемени приходи од продажба за 12% повеќе од лани. Друштвото Цигари планира производство на 1,3 милиони килограми цигари, но за разлика од лани, повеќе од двојно се намалени планираните приходи од продажба Според планот за работа, компанијата која произведува тутун и е дел од прилепскиот тутунски комбинат, за годинава планира да инкасира 12,9 милиони евра приходи од продажба на тутун и 12 илјади евра од други приходи. Предвидено е да се потроши суровина во вредност од 9,7 милиони евра, а вкупно 2,3 милиони евра ќе чинат трошоците на трудот. За разлика од лани, годинава, друштвото има намалени трошоци за вработените, кои ја чинат компанијата 17 илјади евра. Сепак, и покрај намалените трошоци и зголемените приходи, друштвото нема да успее да ја надмине загубата која е планирана на 606 илајди евра. Друштвото Цигари, исто така дел од тутунскиот комбинат, годинава планира да произведе 1,3 милиони килограми цигари, од кои, 710 илјади килограми се наменети за продажба на домашниот пазар и 590 илајди килограми за странски пазар.За разлика од лани, повеќе од двојно се намалени планираните приходи од продажба и услуги, при што на домашен пазар се предвидени приходи од продажба на цигари во вредност од 8,8 милиони евра а на странски пазар се предвидени приходи од 3,1 милион евра. Останатите приходи, компанијата планира да ги прибере од продажба на лепило , реализација на трговски стоки и сл. Вкупните трошоци се планирани на 15 милиони евра, додека загубата ќе изнесува 1,8 милиони евра, за два пати поголема од лани. Комбинатот избра нов менаџерски тим, но не успеа да го усвои извештајот за работењето лани Иако седниците на собранието на акционери на прилепскиот тутунски комбинат неколку пати беа одложувани, на презакажаната седница која се одржа на 11 јуни годинава акционерите успеаја да изберат нов менаџерски тим , но не го усвоија извештајот за работењето на компанијата заедно со друштвата за минатата година. Лани Комбинатот заблежа загуба од дури 11,5 милиони евра, иако имаше поголеми приходи од продажба во споредба со 2011 година. За цела година инкасираше 20 милиони евра од продажба на цигари при што само на домашниот пазар се продадоа цигари во вредност од 17,7 милиони евра и 2,1 милион евра од продажба на странските пазари. Состојбата не е драстично сменета ниту од почетокот на годината, при што само во првиот квартал е забележана загуба од 1,1 милион евра. Анализата на приходите покажува дека од продажба на домашниот пазар во првите три месеци од годинава комбинатот оствари 4,2 милиони евра, додека од продажба на странските пазари 1,2 милиони евра. С.Н