Уљукаев: Руската економија влегува во рецесија поради санкциите од западот

Добивај вести на Viber

Санкциите на западот за Русија поради нејзината улога во кризата во Украина најверојатно ќе потраат подолго време, можеби и децении, истакнал рускиот министер за економија, Алексеј Уљукаев за московскиот весник „Ведомости“. „Кога САД ќе изгласаат некој закон, истиот подоцна многу тешко е да се промени и изгледа како да ќе трае со децении“, изјавил Уљукаев, пренесува „Ројтерс“. Руската економија влегува во рецесија, во која ја влечат санкциите на западните зенји и ниската цена на нафтата, бидејќи, приходите од продажбата на овој енергенс сочинуваат голем дел од рускиот  државен буџет. Рубљата од почетокот на оваа година ослабна за повеќе од 45 отсто во однос на доларот. Уљукаев наведува дека недостатокот од структурни реформи во економијата предизвикал „совршена олуја“ во Русија. „Руската економија, доколку не беа санкциите, падот на цената на нафтата и доколку не направевме некои „будалести“ работи, би пораснала за 2,5 до 3 отсто оваа година“, истакнал рускиот министер за економија. Идната година санкциите за Русија би можело да бидат уште поостри, а ситуацијата на пазарите на нафтата уште потешка, додава тој. Уљукаев смета дека многу е тешко да се предвиди ситуацијата па затоа земјата не може да биде подготвена на случувањата во идниот период. „Дали треба да разработиме уште едно сценарио покрај ова за нафтата која се продава за помалку од 60 долари за барел? Да пробаме со 40, 20, 10 долари?, зљапрашал иронично министерот, пренесува „Ведомости.