Уште една голема исплата на надомест на штета за случајот „Претседавач“ со АД Машинопромет

Добивај вести на Viber

Министерството за правда на Сузана Пашоска и исплатило 1,95 милиони денари, или околу 32.000 евра на 13 октомври како надомест за штета за случајот „Претседавач“, поврзан со стечајот на АД Машинопромет, што беше отворен во 2013 и заврши неславно за претходната власт. Ова воедно е најголемото обештетување што го исплаќа годинава Министерството за правда.

Мирослав Шиповиќ, поранешниот претседател на Советот на Општина Центар, годинава исто така е обештетен со 20.000 евра од Министерството за правда за долговремениот притвор за контроверзниот случај „Претседавач“ во кој тој беше обвинет за наводни злоупотреби во работењето и избегнување данок од 17 милиони денари како екс-раководител на „Машинопромет“.

Надомест на штета од Министерството за правда во истиот период добил и неговиот брат Ненад Шиповиќ, кој е исплатен со слична сума. Тој исто така беше еден од осумтемина притворени во акцијата „Претседавач". Тогашната власт беше критикувана дека преку сценарио сака да го неутрализира мнозинството на опозицијата во Општина Центар откако беше најавено дека ќе се чешла проектот „Скопје 2014“. Тогашната опозиција во Центар победи по три прегласувања за време на локалните избори. 

Од министерството за „Фактор“ потврдија дека се работи за исплата на надомест на штета по добиена судска одлука, откако Пашовска неосновано минала осум месеци и 23 дена во притвор и куќен притвор. Таа беше седмообвинета во случајот како раководител на Одделението за присилна наплата во регионална дирекција на УЈП во Скопје. Тогаш според Обвинителството, Пашоска иако знала дека се водат постапки за присилна наплата на даночен долг на АД „Машинопромет“, наместо согласно Законот за даночна постапка да ги спроведе постапките за присилна наплата  за даночен долг, дозволила трговската стока за продажба која се наоѓала на залиха во АД „Машинопромет“ да биде отпишана и отуѓена со продажба како старо железо 

Министерството за правда во текот на месец март им ги исплати парите на браќата Шиповиќ врз основа на правосилна судска пресуда со која Министерството за правда било задолжено да им исплати на овие лица по основ на неосновано лишување од слобода - притвор, вкупен износ од 2.160.000 денари од кои на тужителот Мирослав Шиповиќ износ од 1.200.000 денари, а на тужителот Ненад Шиповиќ износ од 960.000 денари со соодветна законска казнена камата и трошоци на постапка.

Вкупните суми, според статистиката која ни ја достави Министерството за правда, рапидно растат во 2018 и 2019 година, кога се многу повисоки во однос на претходните. Во 2018 година за 10 случаи исплатени се вкупно 4.794.469 денари, а во 2019 за 9 предмети исплатени се 4.884.869 денари на име надомест на штета со законска казнена камата и трошоци на парнична постапка.