УСПЕШЕН АГРОБИЗНИС: Струмичанец одгледува органски јагоди, работа има, но има и профит!

Добивај вести на Viber

Дека органски произведената храна  се бара и е добро платена, потврдува и Бранко Атанасов од Струмица, дипломиран земјоделски инженер, повеќегодишен сертифициран органски производител на овошје. 

Атанасов е фокусиран пред сè на прозиводство на органски јагоди. Вели дека органското производство бара многу труд и грижа, но му помагаат блиските. Тој е потпретседател и еден од оснивачите на локалното здружение на производители на органски производи „Органо-погистик“ и сертифициран советник за органско производство.

Атанасов раскажува дека со органското производство се занимава уште од почетоците на развојот на органското производство во Македонија, а многу поинтензивно тоа го прави во последниве години. Во неговата органска фарма која се наоѓа на 7 километри од градот имаат застапено повеќе видови на овошки, од кои најголем дел заземаат јагодите во пластеници и малините, секои од нив засадени на  околу 700 м².

„Јас сум вработен во тераписката заедница  „Покров“ која е рехабилитациона програма за одвикнување од зависности и на чии површини, и  исто така практикуваме органско производство. Ми помага сопругата која исто така е вработена, како и родителите кои скоро цела година престојуват на фармата. Органското производство е трудоинтензивно, па секоја помош е повеќе од добредојдена. Досега не сум имал проблем околу пласманот на сите производи, дури е евидентен и недостаток и зголемена побарувачка на истите. Сето производство го пласирам во Скопје кај Прва кооператива на потрошувачи на органска храна „Наша добра земја“, со која имам одлична соработка. Сертифицираните органски производи се многу поквалитетни од конвенционалните, не содржат резидуи од хемиски препарати и ѓубрива бидејќи се одгледуват на природен начин и со природни препарати за заштита и исхрана. Затоа и нивната цена е повисока и во зависност од културата и пазарните текови, се движи од 30-80% , а со тоа и заработувачката е поголема“ - вели Атанасов. 

Раскажува дека порано било многу потешко органски да се произведува храна бидејќи користеле ѓубрива и средства за заштита кои сами ги подготвувале. 

„Сега веќе на пазарот сè повеќе има достапни средства за заштита и исхрана кои исто така од соодветни тела се сертифицирани за употреба во органското производство. Јас проблемите би ги идентификувал во сè уште недоволната едукација на производителите околу справувањето со потенцијалните или настанатите проблеми и нивно решавање. Затоа обавуваме обуки каде го спојуваме теоретското и практичното и споделуваме искуства како би можеле да ги превенираат или надминат проблемите“ - додава тој. 

Атанасов ги охрабрува производителите барем еден дел од своите површини да ги преориентират во органски и да направат споредба со конвенционалните. Објаснува дека ако можат јаболката и јагодите кои на некој начин се синоним за третирано овошје да бидат органски произведени, тогаш би можеле и другите култури.

Сања Атанасовска