Вакцината на Фајзер/БионТек го запира новиот британски вид на корона вирус

Добивај вести на Viber

Вакцината против корона вирусот, развиена од Фајзер/Бион Тек, веројатно ќе биде ефикасна и против новиот вид кој за прв пат беше откриен во Велика Британија. Ова го покажуваат резултатите од лабораториските тестови на двете компании, пишува денеска „Фајненшл тајмс“. 

Варијантата, позната како Б.1.1.7, има голем број мутации кои предизвикуваат загриженост дека може да ја заобиколи заштитата изградена од вакцините. Но, истражувачите од седиштето на БионТек во Мајнц откриле дека новите мутации биле неутрализирани со антитела во крвта на 16 пациенти кои примиле вакцина во претходните клинички испитувања. Половина од нив се постари од 55 години.

Студијата сè уште не е објавена во журнал. Компаниите забележуваат дека не постои значајна биолошка разлика во неутрализацијата помеѓу резултатите од лабораториските тестови на новата мутација и откриениот вид ма корона вирус во Кина во јануари 2020 година. Но, авторите истакнаа дека продолжуваат да ги следат значителните промени во Сарс-Ков-2. 

Ова е прв тест од ваков вид спроведен од самиот производител на вакцини, додека компаниите брзаат да видат дали нивните вакцини се ефикаснии и против новиот вид. На почетокот на овој месец, Фајзер и истражувачите од Универзитетот во Тексас веќе испитаа една од многуте загрижувачки промени во новиот вид, што се појави во Велика Британија и Јужна Африка. Модерна и Оксфорд/АстраЗенека објавија дека очекуваат нивните вакцини да обезбедат заштита од мутацијата Б.1.1.7.