(ВИДЕО) БЕРЛИН ДЕНЕС: Над 100.000 на одбележувањето на четврт век од падот на Берлинскиот ѕид

Добивај вести на Viber

Одбележувањето на 25-годишнината од падот на Берлинскиот ѕид приблече повеќе од 100.000 жители и туристи во центарот на овој некогаш поделен град. Голем број од нив се собраа покрај „појасот на смртта“ од 15 километри каде штп некогаш стоеше ѕидот, а на чие место сега беа поставени 8.000 светлечки балони. Балоните биле поставени на висина од 3,6 метри, колку што бил навистина висок ѕидот, што во 1961 година го подигна поранешната Источна Германија во обид да ги спречи своите жители да преминуваат во западниот дел на градот. Германската канцеларка Ангела Меркел, која пред 25 години беше млада научничка во комунистичкиот источен Берлин и која на 9 ноември 1989 година исто така ја почувствува слободата, вели дека уривањето на Ѕидот засекогаш ќе биде запаметено како триумф на човечкиот дух. „Падот на Берлинскиот ѕид ни покажа дека соништата можат да се остварат и дека ништо не мора да биде онака како што е, без разлика колку некои пречки изгледаат големи“, рекла 60-годишната Меркел, која од 2005 година е на чело на обединета Германија. http://www.youtube.com/watch?v=cwyQYfVnzps Се верува дека повеќе од 100.000 жители на Источна Германија се обиделе да побегнат во западниот дел по ненадејното подигање на ѕидот во 1961 година. Од нив, најмалку 600 биле убиени, од кои 136 на самиот Берлински ѕид. Во моментот кога 8.000 светлечки балони од Ѕидот беа пуштени во воздухот вечерва, Берлинската филхармонија ја изведуваше Одата на радоста, од Деветтата симфонија на Бетовен, неофицијална химна на мирот и на единствена Европа.