(ВИДЕО) ГОЛЕМИ НЕМИРИ ВО САД: Полицијата со солзавец и предупредувачки истрели ја растерува толпата

Добивај вести на Viber

Двајца полициски службеници се повредени, а четири лица уапсени во нередите до кои дојде во предградието Сент Луис, во Беркли, откако се случи уште еден инцидент во кој полицаец со истрели од огнено оружје усмрти еден афроамерикански тинејџер, се вели во полициското соопштение. Групата демонстранти доцна синоќа го блокирала сообраќајот во Беркли на околу 45 минути, а според изјави на очевидци, полицијата користела солзавец за да ја растера разлутената толпа, пренесува „Ројтерс“. Демонстрантите легнувале на улиците во знак на протест против убиството кое го изврши полицијата. Тинејџерот Антонио Мартин (18) беше убиен пред два дена на бензиска пумпа недалеку од Фергусон, каде претходно бел полициски службеник го уби и тинејџерот Мајкл Браун. Градоначалникот на Беркли, Теодор Хоскинс, изјавил дека овие два инциденти не може да се споредуваат и дека не сака да избрзува со заклучоци, но потенцирал дека постојат видни разлики помеѓу овој и инцидентот во кој загина Браун. Сличен став изнела и сенаторката на државата Мисури, Марија Шапел – Надал, која се нашла на удар на протестите за Браун бидејќи рекла дека верува оти полицискиот службеник во Беркли имал оправдување да пука. До пукањето дошло откако полицискиот службеник дошол да провери пријава за кражба. Полицаецот излегол од својот автомобил за да разговара со двајца мажи на бензиската пумпа но еден од нив вперил во него револвер од 9 мм. Потоа и полицаецот го извадил својот револвер, исчекорил наназад и испукал три куршуми, од кои еден го погодил момчето и веднаш го усмртил. Во САД веќе подолго време се води жестока дебата во врска со односот на силите за безбедност кон Афроамериканците, како и поради претерано агресивните акции на полицијата. [embed]http://www.youtube.com/watch?v=mOMrwtgGrI0[/embed]