Милошоски се спротистави на својата партија - Ќе присуствува на семакедонскиот протест

Добивај вести на Viber

Спротивно од својата партија, пратеникот од редовите на ВМРО-ДПМНЕ, Антонио Милошоски, преку порака од својот профил на „Фејсбук“ го најави своето присуство на денешниот семакедонски протест за името и за идентитетот во Скопје. Тој истакна дека ќе ја даде својата поддршка за зачувување на идентитетот и на уставниот суверенитет на Република Македонија.

„Утрешниот протест за зачувување на идентитетот и на уставниот суверенитет на Република Македонија, доколку биде достоинствен и мирен, без разлика што е зимно време, може да ѝ биде и од помош на државата, без разлика кој раководи со неа. Јас ќе присуствувам на тој протестен собир и ќе имам можност да бидам како еден чесен, родољубив граѓанин на Република Македонија, дел од луѓето што сметаат дека треба да бидат присутни на овој протест. Дали некој сака да присуствува или не сака, може или не може, тоа е лична работа, но мислам дека како граѓани, како нација, како народ, добро е да покажеме дека имаме став. Борбата ниту ќе почне утре, почнала многу одамна, ниту ќе заврши тука. Ќе ни треба многу мудрост, визија, трпение и аргументи. Сепак, најмногу од сè, ќе ни треба слога. И во името на таа национална слога, јас ќе ја дадам мојата поддршка за утрешниот протест“, рече Милошоски.

Од ВМРО – ДПМНЕ  вчера со соопштение  до јавноста се оградија и објавија дека не се  организатор, ниту стојат зад протестот закажан за денес во 18 часот.