(ВИДЕО) Савка Димитрова: Знаев да избркам работник за ситна кражба

Добивај вести на Viber

Савка Димитрова беше долгогодишен директор на АД Европа со преземање на позицијата од 1987, а сега е гостин во најновото издание на поткастот „Бизнис Муабети“ со Мишко Иванов.

Зборува за стереотипите кои своевремено ги обременувале жените менаџерки, но за неа не постоеле емоции ако се работи за недисциплина.

Тоа што е во интерес на фирмата - ако е злоупотребено, тука ми е чиста совеста дека настапот требало да биде таков

Димитрова зборува за предизвиците со тогашната инфлација и нестабилен курс на динарот, но и за таканаречените „златни времиња“ на Европа и како било избегнато грчкото ембарго. Со кондиторскиот производител минала 44 години, а кога била на чело немала работно време, односно и кога била дома „работела до затворање на производството навечер“.

Во еден момент компанијата имала извоз во 20 земји надвор од југословенскиот пазар, а во едно време тој достигнал 64 отсто од продажбата во постјугословенскиот период. Голем проблем претставувале и регулациите во новите југословенски држави кои внесувале забуни во планирањето на производството.

Во Австралија најмногу се продавале наполитанките и популарните „бастуни“, а во САД најмногу ги барале бонбоните. Димитрова зборува и за регионалните и европски кондиторски гиганти, а за „Нестле“ и „Милка“ вели дека ги поседуваат плантажите со највалитетно чоколадо.

Таа е дипломиран технолог и работела во секторот за чоколадо, а во интерес на фирмата „го изучила менаџерскиот занает“ за да стане генерален директор.